Jastardyń qylmysqa barý sebebi Qaraǵandy oblysy ákimdiginde talqylandy
Baǵdarlamalardyń kóptigine qaramastan, keıbir jastar jumys isteýge, oqýǵa asyqpaıdy. Jumyssyz jastar arasynda quqyqbuzýshylyqtar da bolyp turady.
Jastar qylmysynyń deńgeıin tómendetýge yqpal etý tetikteri búgin Qaraǵandy oblysy ákimdigi janyndaǵy Quqyq buzýshylyqtardyń aldyn alý jónindegi vedomstvoaralyq komıssııanyń otyrysynda qaraldy.
Óńirde 14-28 jas aralyǵyndaǵy 260 myńnan astam adam turady. Olar jyl saıyn 1 myńnan astam qylmystyq quqyq buzýshylyq jasaıdy.
«Osy jyldyń qorytyndysy boıynsha jastar jasaǵan qylmystardyń 32,2% tómendegeni baıqalady. Mas kúıinde jasalǵan qylmystar sany da 2 esege azaıdy», – dep habarlady Qaraǵandy oblysy Polıtsııa departamenti bastyǵynyń birinshi orynbasary Qurmanǵalı Ysmaǵulov.
Oń statıstıkaǵa qaramastan, jastar qylmysy problemasy áli de ózekti bolyp otyr. Urlyq, alaıaqtyq, kólik jáne usaq urlyq basym. Jastar qylmysqa kóbine maskúnemdikten jáne jumyssyzdyqtan barady.
Internettegi qylmystyń kóbeıýi erekshe nazar aýdarýǵa turarlyq. Kıbervolonterler olarmen kúresýge kiristi.
Polıtseılerdiń pikirinshe, barlyq joǵary oqý oryndarynda stýdenttik jasaqtardy damytý kerek. Olar quqyqtyq tártipti qamtamasyz etip qana qoımaı, mádenı is-sharalar ótkizedi. Ázirge oblys boıynsha osyndaı segiz jasaq bar.
Sondaı-aq, oblystyń ár óńirinde 19 Jastar resýrstyq ortalyǵy jumys isteıdi. Munda tegin quqyqtyq, psıhologııalyq jáne áleýmettik keńester ótkiziledi.
Jastar saıasaty máseleleri basqarmasy halyqty jumyspen qamtý quraldarynyń biri jas kásipkerlerdi qoldaý dep atady. Bıyl jastar kásipkerligin damytýǵa oblystyq jáne jergilikti bıýdjetterden 200 mln teńgeden astam qarajat bólindi.
Bos ýaqytty jaqsy ótkizý – bul sport. Bıyl buqaralyq sportty qarjylandyrý eki esege artty.
«Bul sportpen aınalysýǵa qosymsha jeti myńnan astam balany tartýǵa múmkindik beredi. Oblystyq basqarmanyń, qalalar men aýdandar ákimderiniń mindeti – osyǵan erekshe nazar aýdarý. Jáne árıne de, jumysqa ornalastyrý. Pandemııany eskere otyryp, bizdiń oblystyń jas turǵyndaryn jumyspen qamtamasyz etý úshin keshendi sharalar qabyldaý qajet», – dep atap ótti óńir basshysy Jeńis Qasymbek.
Otyrysta sondaı-aq alkogol jáne turmystyq qylmystarǵa qarsy is-qımyl boıynsha sharalar aıtyldy.
Densaýlyq saqtaý salasynyń qaramaǵynda Qaraǵandy, Temirtaý, Balqash jáne Jezqazǵandaǵy tórt beıimdeý ortalyǵy bar. Sondaı-aq, oblysta esirtkige táýeldiler úshin qoldaýshy almastyrýshy terapııanyń eki pýnkti bar. Dárigerler halyq úshin qadamdyq qoljetimdilikte bastapqy psıhıkalyq densaýlyqtyń qosymsha ortalyqtaryn ashýdy usyndy.
Otbasylyq zorlyq-zombylyqqa qarsy is-qımyl boıynsha 2019 jyly polıtseılerge kinálini kezekshi bólimniń janyndaǵy arnaıy bólmede 24 saǵatqa deıin ustaýǵa múmkindik beretin shara engizildi. Áıelder men balalarǵa qatysty quqyq buzýshylyqtardyń aldyn alý máseleleri boıynsha 11 úkimettik emes uıymmen jáne qoǵamdyq birlestiktermen jumys jolǵa qoıyldy. Oblysta turmystyq zorlyq-zombylyq qurbandaryna arnalǵan baspanasy bar toǵyz daǵdarys ortalyǵy ashyldy. Olarǵa qazirdiń ózinde 50-den astam adam júgindi.
«102» mobıldi qosymshasy men SOS núktesi ózin jaqsy jaǵynan kórsete bildi. Qosymshanyń kómegimen eldiń ár turǵyny polıtsııaǵa quqyq buzýshylyq týraly habarlama jibere alady, sonymen qatar operatormen baılanysýǵa múmkindik bar.
