Jastardyń kadrlyq rezervine úmitkerlerdi qabyldaý bastaldy
ASTANA. QazAqparat - «Jastar kadrlyq rezervi -2017» respýblıkalyq jobasy iske qosyldy. Bul týraly búgin Ortalyq kommýnıkatsııalar qyzmetindegi baspasóz máslıhatynda málim boldy, dep habarlaıdy QazAqparat.
«Ózderińiz bilesizder, «Jastar kadrlyq rezervi» jobasy 2009 jyldan bastap júzege asyp jatyr. Segiz jyldyń ishinde jobaǵa 14 000 astam jastar qatysty, olardyń ishinen 420 adam ashyq irikteýden, testileýden, baǵalaýdan ótip, olar túrli salada qyzmet etýde. Sondyqtan búgin kezekti ret arnaıy jarııalanyp otyrǵan konkýrstyń maqsaty bolashaqqa bilikti kadrlardy daıarlaýǵa negizdelgen», - dep toqtaldy Májilis depýtaty Baqtııar Máken.
Atap aıtqanda, jobaǵa 18-29 jas aralyǵyndaǵy Qazaqstan azamattary qatysa alady. Osy oraıda ótinimderdi qabyldaý rezerv.kz saıtynda bıylǵy 12-30 qyrkúıek aralyǵynda júrgiziledi. Sonymen qatar jobada birneshe kezeń qamtylǵan, ıaǵnı onda qatysýshyny tirkeý, irikteý, bilim berý kezeńi jáne taǵylymdamadan ótý satylary eskerilip otyr.
Joba nátıjeleri boıynsha memlekettik árbir óńirinen úsh adamnan jalpy 48 adam iriktelinedi. Sodan keıin 32 adamnan quralǵan pýll jasaqtalyp, olar Astanada biliktiligin shyńdap, Parlament Májilisinde eki aptalyq taǵylymdamadan ótedi. Al qalǵan 16 adam memlekettik organdar men ulttyq kompanııalarda taǵylymdamamen qamtylady.
«Jalpy, «Jastar kadrlyq rezervi» - jastar saıasaty salasyndaǵy qajeti jobalardyń biri bolyp tabylady. Jastardyń bolashaq qalyptasýyna memleket tarapynan da úlken qoldaý bar. Bizd osy jobanyń kómegimen elimizdiń jas urpaǵynyń eń jaqsy áleýetine negizdelgen kúshti rezervti qurýdy kózdep otyrmyz», - dedi B. Máken.
Aıta keteıik, bul joba boıynsha «Bolashaq» qaýymdastyǵy, Din isteri jáne azamattyq qoǵam mınıstrligi, «Nur Otan» partııasynyń qoldaýymen iske asyrylýda. Jobanyń maqsaty - jastar arasynan memlekettik basqarý júıesi, bıznes pen qoǵamdyq qyzmet úshin zamanaýı ári tıimdi basqarýshylardyń jańa tobyn qalyptastyrý.
