Jastardyń «Innovatsııalyq Qazaqstan» respýblıkalyq konkýrsynda eki aıda 500-den astam ıdeıa jınaqtaldy

«Samuryq-Qazyna» ulttyq ál-aýqat qory qazaqstandyq oqý oryndarynyń naqty tehnologııalyq serpindi qamtamasyz etýge múmkindik beretin jetkilikti ǵylymı bazasy bar dep sanaıdy. Qor Basqarmasynyń Tóraǵasy Tımýr Qulybaev atap ótkendeı, «ǵylymmen aınalysqysy keletin jas ǵalymdar men mamandarǵa qoldaý kórsetýdiń júıeli sharalaryn retke keltirý qajet». «Innovatsııalyq Qazaqstan» konkýrsy qazaqstandyq kompanııalardyń damýy úshin qyzyqty bola alatyn ǵylymı ázirlemelerge jastardy tartýdyń jarqyn úlgisi bolyp otyr»,-delingen «Samuryq-Qazyna» ulttyq ál-aýqat qory» AQ baspasóz qyzmetiniń taratqan málimetinde.

«Tehnologııalyq serpin» atalymyna berilgen ótinimder sany boıynsha birneshe apta qatarynan birinshi orynda M.Áýezov atyndaǵy Ońtústik Qazaqstan memlekettik ýnıversıteti tur.

Berilgen ótinimder sany boıynsha «Áleýmettik ıdeıa» atalymynda S.Toraıǵyrov atyndaǵy Pavlodar memlekettik ýnıversıteti kósh basynda keledi. «Bul konkýrs stýdentter men jastar arasynda eleýli oqıǵa bolyp otyr. Ol bastamashyl adamdardyń áleýetin qyzdyryp qana qoımaı, olardyń tájirıbede qoldanylýyna sebepker bolady. «Samuryq-Qazyna» qorynyń tehnologııalyq problemalardy sheshýge otandyq ǵylymdy tartýǵa umtylyp, bul protseste belsendi ǵylymı jastarǵa ıek artyp otyrǵandyǵy qýantady. Sebebi jastar osyndaı bastamalardyń arqasynda ǵylymmen aınalysý - tıimdi ári bedeldi ekendigin túsinedi» - dep atap ótti S.Toraıǵyrov atyndaǵy Pavlodar memlekettik ýnıversıtetiniń rektory Erlan Aryn.

Aıta keteıik, 2011 jylǵy qyrkúıekte «Samuryq-Qazyna» ulttyq ál-aýqat qory» AQ jastar arasynda «Innovatsııalyq Qazaqstan» respýblıkalyq konkýrsyn bastady. Qor «Tehnologııalyq serpin» jáne «Áleýmettik ıdeıalar» dep atalatyn eki atalym boıynsha jastar bastamalaryn anyqtap, qoldaý kórsetýge umtylady. Konkýrstyń on fınalshysy «Samuryq-Qazyna» UÁQ kompanııalar tobyna jumysqa qabyldanatyn bolady. Al jeltoqsanda bilim berý grantyn ıelenetin eki jeńimpaz anyqtalady. Jeńimpazdar ózderiniń qalaýy boıynsha shetelde tildik kýrsta, ǵylymı dáreje taǵaıyndaýsyz sheteldik JOO-da oqı alady nemese otandyq ne sheteldik kompanııada ǵylymı-óndiristik tájirıbeden ótý múmkindigine qol jetkizedi.