Jastardyń dinı saýatyn kóterý jáne ol týraly jan-jaqty aqparat berý biz úshin mańyzdy mindet - Bilim jáne ǵylym mınıstrliginiń ókili
ASTANA. Tamyzdyń 10-y. QazAqparat /Aıdar Ospanalıev/ - Dinı tárbıe qoǵam azamattaryn durys jolǵa salýdyń bir joly. Sondyqtan jastardyń dinı saýatyn kóterý jáne olar týraly jan-jaqty aqparattar berý Bilim jáne ǵylym mınıstrliginiń basty mindetteriniń biri bolyp otyr.
Bul týraly búgin Astanada «Jastar arasyndaǵy dinaralyq qatynas: problemalar, olardyń sheshilý joldary», atty taqyrypta ótken dóńgelek ústel otyrysynda Bilim jáne ǵylym mınıstrliginiń Tárbıe jumysy jáne jastar saıasaty departamentiniń dırektory Madııar Qojahmet málim etti.
Onyń sózine qaraǵanda, osy maqsatta eldegi oqý oryndarynda din sabaqtary engizildi. Bul tek memleket tarapynan ǵana atqarylyp jatqan sharalar emes. Igi iske eldegi dinı ortalyqtar men jastar uıymdarynyń ókilderi de atsalysýda. «Sondyqtan búgingideı jıyndardyń jastar arasynda udaıy ótkizilip turýy óte paıdaly. Aıta keterlik másele - osy kezde elimizde 2011-2020 jyldardy qamtıtyn bilim berý salasynyń memlekettik baǵdarlamasyna daıyndyq jumystary júrgizilýde. Atalmysh baǵdarlamanyń bir bóligi bilim berýmen qatar jastar arasynda salaýatty ómir salty men tárbıelik máni bar sharalardy qolǵa alý máselesi de engizilmek. Ótken jyly biz bilim berý salasynda sheksiz tárbıe berý tujyrymdamasyn qabyldaǵan bolatynbyz. Onda da dinı saýattylyq jáne jalpy din máseleleri erekshe oryn aldy», dedi departament dırektory.
