Jastardyń dinı «ımmýnıtetin» qalyptastyrý úshin óz mázhabymyzdy oqytýdy kúsheıte alamyz ba - mınıstrdiń jaýaby
Osynyń nátıjesinde jastardyń boıynda dinı «ımmýnıtet» qalyptasady. QazAqparat tilshisine suhbat bergen QR Din isteri jáne azamattyq qoǵam mınıstri Nurlan Ermekbaev osy pikirge qatysty óz oıyn bildirdi, dep habarlaıdy QazAqparat tilshisi.
«Qazaqstan - kópultty ári kóp konfessııaly memleket. Bizde basqa konfessııalardyń kóp ekenin bárimiz jaqsy bilemiz. Al solardyń ishinde musylmandar jaıynda aıtatyn bolsaq, olardyń ishinde dinge qyzyǵatyn jáne qyzyqpaıtyn adamdar da bar. Bul - zaıyrly memleketke tán nárse. Sondyqtan dinge qyzyǵýshylyǵy bar adamdarǵa, árıne, mindetti túrde ózimizdiń dástúrli dinı ustanymymyzdy durys jetkizýimiz kerek. Alaıda zaıyrly memlekettiń basty qaǵıdattaryna sáıkes, dinge qyzyǵýshylyǵy joq adamdarǵa jasandy túrde dindi nasıhattaýdyń qajeti joq, olardy mindetteýge bolmaıdy», - deıdi N.Ermekbaev. Onyń aıtýynsha, búginde dinge baılanysty memlekettik saıasat salasynda tujyrymdama ázirlenip jatyr. «Qazir ony jan-jaqty talqylap jatyrmyz. Onda jalpy teorııalyq máseleler qamtylyp, din salasyndaǵy negizgi qaǵıdalarǵa túsinikteme beriletin bolady», - dep atap kórsetti mınıstr.
Aıta keteıik, Astanada ótken jıyndardyń birinde Parlament Májilisiniń depýtaty Máýlen Áshimbaev «radıkaldy aǵymdarǵa qarsy kúresýdiń birden-bir joly ol - óz ıdeologııamyzdy kúsheıtý» degen pikirin bildirgen bolatyn.
«Radıkaldy aǵymdar - bul ıdeologııa.Oǵan jaıdan jaı tyıym sala almaısyń. Qoǵamdyq uıym bolsa, jaýyp tastaýǵa bolatyn edi. Al ıdeologııaǵa biz qalaısha tyıym salamyz? Árıne, qandaı da bir sheshimderdi qabyldaýǵa bolady. Alaıda ıdeologııamen kúresýdiń eń tıimdi joly - oǵan qarsy basqa ıdeologııany qoıý. Biz oǵan qarsy óz ıdeologııamyzdy qarsy qoıýymyz qajet. Bizdiń ıdeologııamyz - Hanafı mazhaby ıdeologııasy, toleranttylyq ıdeologııasy, mádenıaralyq dıalog ıdeologııasy. Mine, biz osy turǵyda kúres sharalaryn júrgizýimiz kerek», - dedi M.Áshimbaev.
Depýtattyń aıtýynsha, elimizde lańkestik áreketterdiń jıilep ketýine tek ishki ister mınstrligi, ulttyq qaýipsizdik komıteti men prokýratýra organdary ǵana jaýapty dep oılaýǵa bolmaıdy.
«Iá, atalǵan kúshtik qurylymdar ondaı áreketterge jol bermeýi kerek. Degenmen, jaýapkershiliktiń júgi búkilqazaqstandyq qoǵamǵa túsip otyr. Sonyń ishinde azamattyq qoǵam ınstıtýttary, bilim berý júıesi, buqaralyq aqparat quraldary, úkimettik emes uıymdar jáne taǵysyn taǵy. Bul degenimiz, biz bárimiz sol qaýip-qaterlerdiń aldyn alýdy oılaýymyz qajet. Óz ıdeologııamyzdy kúsheıtýimiz kerek», - dep atap kórsetti Májilis depýtaty.
