Jastardyń bilimge degen yqylasy qazir artyp kele jatyr
ALMATY. Sáýirdiń 8-i. QazAqparat /Erlik Erjanuly/ - Jastardyń jańalyqqa degen qumarlyǵy bilim salasyna da óz yqpalyn tıgizýde.
Bul búgin Almatyda ótip jatqan «Qazaqstan halyqaralyq bilim keńistiginde» dep atalatyn stýdentterdiń ІІ Halyqaralyq ǵylymı konferentsııasynda aıtyldy, dep habarlaıdy QazAqparat.
Oǵan Qazaqtyń Abaı atyndaǵy ulttyq pedagogıka ýnıversıtetiniń daıyndyq fakýltetindegi Iran, Koreıa, Qytaı, Mońǵolııa jáne Túrkııa elderinen kelgen sheteldik jáne Qazaqstannyń túrli joǵary oqý oryndarynda oqıtyn stýdentter men jas ǵalymdar qatysýda. Konferentsııa jumysy qazir pedagogıka, fılologııa ǵylymdary, áleýmettik-gýmanıtarlyq ǵylymdar jáne jas ǵalymdar dep atalatyn 4 sektsııa boıynsha júrip jatyr.
«Bul sharanyń maqsaty - ýnıversıtettiń halyqaralyq baılanysyn keńeıtý jáne stýdentterdi ǵylymı-zertteý jumystaryna baýlý. Olar osyndaı konferentsııalar arqyly kópshiliktiń aldyna shyǵyp sóıleýge, baıandama, referat pen kýrstyq jumystaryn saýatty ázirleýge jáne halyqaralyq ǵylymı konferentsııalarǵa qatysýǵa tájirıbe jınaqtaıdy. Árıne, daıyndyq bólimindegilerdiń jumystarynda úlken jańalyqtar bolmaýy múmkin. Biraq ózge stýdentterdiń arasynda jańa baǵdarlamalary men oqý quraldary úshin avtorlyq kýálikterge qol jetkizgender kezdesýi kúmánsiz», deıdi dástúrli halyqaralyq stýdentter konferentsııasyn uıymdastyrý komıtetiniń múshesi professor Sáýle Begalıeva. Daıyndyq fakýltetiniń shet elden kelgen stýdentterge arnalǵan orys fılologııasy kafedrasy meńgerýshisiniń aıtýynsha, qazirgi tańda QazUPÝ-da 300 sheteldik stýdent bilim alýda. Álemniń 95 joǵary oqý ornymen baılanys jasaıtyn ýnıversıtette seriktestermen stýdentter men oqytýshylar almasý isi de jolǵa qoıylǵan.
