Jastardyń basym bóligi óndiristik sala emes, gýmanıtarlyq sala mamandyǵy boıynsha oqyp jatyr - BǴM
ASTANA. QazAqparat - Jastardyń basym bóligi óndiristik sala emes, gýmanıtarlyq sala mamandyǵy boıynsha oqyp jatyr. Bul týraly búgin Májiliste tegin tehnıkalyq jáne kásibı bilim berý tetigin engizý máselelerine arnalǵan dóńgelek ústelde QR Bilim jáne ǵylym mınıstri Erlan Saǵadıev málim etti.
Mınıstrdiń keltirgen deregine qaraǵanda, búgingi kúni respýblıka boıynsha 807 kolledj jumys istep tursa, olardyń 345-i jeke menshik nysanynda bolyp tabylady. «Kolledjderde 499,5 myń adam bilim alýda. Bul rette ondaǵy jastardyń basym bóligi, shamamen 51,5 paıyzy aqyly negizde oqyp jatyr. Sonyń ishinde olardyń negizgi bóligi óndiristik sala emes, gýmanıtarlyq mamandyqtar boıynsha bilim alýda», - deıdi mınıstr E. Saǵadıev.
Onyń sózine qaraǵanda, mektep túlekteriniń jumyspen qamtylý jaǵdaıyna taldaý jasalǵan. «Bizde 2015 jyly 9 synypty bitirgen túlek sany 221 myń adam bolsa, 10-11 synypty jalǵastyrǵandar sany 134 myń, al kolledjderde oqýǵa ketetinder sany 85 myń adam bolyp otyr. Sosyn kolledjdi bitirgennen keıin de 33 myń adam sonda oqýyn jalǵastyrady, olar joǵary oqý oryndaryna barmaıdy. Al 21 myń adam mektep bitirgennnen keıin eshqandaı da arnaıy bilim almaı, birden eńbek naryǵyna keledi», - dedi E. Saǵadıev.
