Jastardyń 80% ózderine qatysty memlekettik baǵdarlamalardan beıhabar - Talǵat Qalıev
ASTANA. QazAqparat - «Jastar» ǵylymı-zertteý ortalyǵynyń dırektory Talǵat Qalıev jastarǵa arnalǵan jańalyqtardy kreatıvti tásilmen berý jóninde usynys bildirdi, dep habarlaıdy QazAqparat.
«Amerıka ondaǵan jyldardan beri yqtııar hattaryn lotereıa túrinde oınatyp, eń aqyldy ári batyl jastardy ózderine shaqyrýda. Kórshiles Qytaı, Reseı JOO-lary da tegin grantpen, qolaıly jataqhanalarymen Qazaqstan jastaryn qyzyqtyryp otyr. Bir ǵana Almatyda 50 myń jataqhanalyq oryn jetispeıdi. Al tutas respýblıkaǵa 75 myń oryndyq jataqhanaǵa salynady. Biraq, Almatyǵa jataqhanany úıip salý qajet pe degen suraq týyndaıdy. Sebebi, mundaǵy oryn jetispeýshiligi jeke JOO-lardy da qamtyp otyr. Birqatar oqý oryndary kezinde jataqhanalaryn beıindi emes aktıv retinde satyp jibergen. Al qazir óz stýdentterin jataqhanamen qamtı almaı otyr», - dedi Talǵat Qalıev Prezıdenttiń bes áleýmettik bastamasyna arnalǵan Qazaqstan halqy Assambleıasy Ǵylymı-sarapshylyq keńesiniń otyrysynda.
Sondaı-aq, ortalyq basshysy jastardyń basym bóliginiń ózderine tıimdi memlekettik baǵdarlamalardan habarsyz ekenin jetkizdi. Zertteýler nátıjesine sáıkes, jastardyń 92,5% -i tamyr-tanyssyz jumysqa ornalasý múmkin emes, memleket jumyspen qamtýy kerek dep esepteıdi.
«Qoljetimdi ıpoteka syndy bes áleýmettik bastamada kórsetilgen qoldaýlar jastardy yntalandyra túsedi jáne masyldyq sezimdi joıýǵa yqpalyn tıgizedi. Áıtse de, Qazaqstan jastarynyń 20 protsenti ǵana ózderi týraly memlekettik baǵdarlamalardan habardar. Qalǵan 80 protsenti óz múmkindikterin bilmeıdi. Mundaǵy másele - jańalyqty jastarǵa jetkizý tásili bolyp otyr. Olar gazet oqymaıdy, alǵashqy 12 sekýndta qyzyqtyra almasa, telearnany da aýystyryp jiberedi. Aqparat jáne kommýnıkatsııalar mınıstrligi qazirgi medıanyń jastarǵa ótimdi bolýyn oılaýy kerek, kreatıvti tásil izdeýi kerek», - dep óz sózin túıindedi T. Qalıev.
