Jastardy jumyspen qamtýdyń keshendi sharalary qarastyrylyp otyr – Tamara Dúısenova

ATYRAÝ. QazAqparat – Elimizde jastardy jumyspen qamtýdyń keshendi sharalary qarastyrylyp otyr. Bul týraly Eńbek jáne halyqty áleýmettik qorǵaý mınıstri Tamara Dúısenova atyraýlyq belsendi jastarmen kezdesýde málim etti, dep habarlaıdy QazAqparat.

Mınıstrdiń pikirinshe, Memleket basshysynyń tapsyrmalaryn oryndaý aıasynda jastardy nátıjeli jumyspen qamtýǵa baǵyttalǵan keshendi sharalar júzege asyrylyp jatyr.

«Ulttyq jobalar men bıznestiń jeke bastamalary sheńberinde qurylatyn barlyq jumys oryndary elektrondyq eńbek bırjasynda ornalastyrylady. Bul platforma bos jumys oryndaryn izdeýdiń de, qyzmetkerlerdi izdeýdiń de biryńǵaı alańyna aınalady. Qazir elektrondyq eńbek bırjasynda jumys berýshilerden 108 myńnan astam bos jumys orny usynyldy. Onyń ishinde iske asyrylyp jatqan ulttyq jobalar sheńberinde 10,4 myń bos jumys orny bar», -dedi Tamara Dúısenova.

Jastardy iri óndiristik kásiporyndarǵa jumysqa ornalastyrý jobasy basty baǵytqa aınalyp otyr. Oǵan birinshi bolyp ERG kompanııalar toby qosylyp, elektrondyq eńbek bırjasynda bos oryndar tizimin usynǵan. Osylaısha, 200-den astam jas maman jumysqa ornalastyrylǵan. Jaqynda basqa kompanııalardan bos jumys oryndary usynylady.

«Ótken aıda elektrondyq eńbek bırjasynda Qazaqstandaǵy alǵashqy onlaın-jármeńkeni ótkizdik. Іs-shara 35 jasqa deıingi jastardy jumysqa ornalastyrýǵa baǵyttaldy. Jármeńkege 23 iri kompanııa, bankter men saýda jelileri qatysyp, 1 330 bos jumys ornyn usyndy. Jumys izdeýshilerden 3,5 myń túıindeme tústi. Qazir jumys berýshiler tańdalǵan kandıdattarǵa odan ári baǵalaý júrgizip jatyr. Mundaı jármeńkeler turaqty ótkiziledi», -dedi mınıstr.

Taǵy bir mańyzdy baǵyt – kásipkerlikti damytý jónindegi ulttyq joba sheńberinde jas kásipkerler men startap-jobalardy qoldaý. Bıyl jastardyń bıznes-ıdeıalaryn júzege asyrýǵa 10 myń grant bólingen. Ótinim joldaýdan grant berýge deıingi protsess Business Enbek platformasynyń kómegimen tolyq avtomattandyrylǵan. Onda úmitkerler barlyq qajetti qujatty elektrondyq formatta toltyrady.

Tamara Dúısenovanyń aıtýynsha, eńbek naryǵynda qıyndyqtarǵa tap bolǵan jastar jumys oryndaryn sýbsıdııalaý boıynsha JOO men kolledj túlekterine arnalǵan Jastar praktıkasyna qatysa alady. Sondaı-aq, bilimi men jumys tájirıbesi joq jastarǵa arnalǵan «Alǵashqy jumys orny» jobasy bar.

Eske sala ketelik, budan buryn Teńizdegi jobadan bosaıtyndardy jumysqa ornalastyrý jóninde Jol kartasy ázirlengenin jazǵan edik.

Foto: Eńbek jáne halyqty áleýmettik qorǵaý mınıstrligi