Jastardy sýıtsıdten qutqarýǵa arnalǵan qarjy qaıda ketip jatyr
ASTANA. QazAqparat -Úkimettiń búgingi otyrysynda QR Din isteri jáne azamattyq qoǵam mınıstri Nurlan Ermekbaev jastarǵa psıhologııalyq kómek berýge arnalǵan bıýdjet qarjysyn jumsaý máselesin kóterdi, dep habarlaıdy QazAqparat tilshisi.
Mınıstrdiń aıtýynsha, búginde jastar arasyndaǵy sýıtsıdtiń kórsetkishi jaǵynan Qazaqstan álem boıynsha Úndistannan keıingi ekinshi orynda keledi. Bul - Dúnıejúzi densaýlyq saqtaý uıymynyń resmı deregi.
«Sarapshylardyń qorytyndysy boıynsha ondaı jaǵdaılardyń 90 paıyzy balalardyń shyn nıeti emes, bul - olardyń janaıqaıy. Biraq biz ony kóp jaǵdaıda estimeı jatamyz. Qazirgi jastardyń basym bóligi bos ýaqytyn teledıdardy kórýmen, mýzyka tyńdaýmen, ıa bolmasa, ǵalamtordy sharlaýmen ótkizedi. Al osy problemanyń negizgi sebebi - mádenı-sporttyq nysandardyń qoljetimdi bolmaýy. Ondaı jerlerge barǵan qymbat bolyp otyr. Budan bólek, jastar saıasaty salasynda bıýdjet qarjysyn tıimdi jumsaý máselesine de basa nazar aýdarý qajet. Úkimettik emes uıymdardyń málimetine sáıkes, 2015 jylda sýıtsıdke jaqyn, ıaǵnı problemaly jastardyń máselesin sheshý sharalaryna barlyq memlekettik tapsyrystyń tek 8,6 paıyzy ǵana jumsaldy. Sol sebepti tıisti memlekettik organdarǵa áleýmettik sharalardy josparlaý barysynda qıyn jaǵdaıǵa tap bolǵan jastar máselesine basa nazar aýdarýǵa keńes beremiz. Osy oraıda qysqa merzimdi emes, uzaqmerzimdi qarjylandyrýdyń bolǵany jón», - deıdi Ermekbaev.
Aıta keteıik, otyrys barysynda mınıstr memlekettik «Daryn» jastar syılyǵyn jyl saıyn berýdi usyndy. Osynyń arqasynda daryndy jastardyń múmkindikterin barynsha keńeıtip, ǵylymı-shyǵarmashylyq yntasyn kúsheıtýge bolady. Budan bólek, Ermekbaev barlyq mektepterde bir ýaqytta«Otbasy saǵatyn» ótkizip , otbasy qundylyqtaryn keńinen nasıhattaýdy usynyp otyr. Osy bastamaǵa bilim mınıstrligi men ákimdikterdiń qoldaýy qajet.
