Jastardy shekaralyq qyzmetke erekshe talappen tańdaǵanymyz abzal - Q. Sultanov
ASTANA. 21 qarasha. QazAqparat - Jastardy shekaralyq qyzmetke erekshe talappen tańdaǵanymyz abzal. Bul týraly Májilistiń jalpy otyrysynda «Qazaqstan Respýblıkasynyń Memlekettik shekarasy týraly» zań jobasyn talqylaý barysynda depýtat Qýanysh Sultanov málim etti.
«Babalarymyz kóziniń qarashyǵyndaı qorǵap, qasyq qanyndaı qasıettep ótken asyl murasy, urpaqtan urpaqqa, ǵasyrdan ǵasyrǵa qalǵan murasy - qazaq jeri. Ejelden qazaq jeriniń belgili shekarasy bolǵanymen, búgingi zamanymyzǵa deıin resmı túrde kórshiles, shekaralas memleketterdiń moıyndap, arnaıy kelisimmen hattalyp halyqarlyq uıymdarmen tanylyp, zańmen bektilgen shekaraǵa ıe bolý baqyty tek táýelsizdik tusynda bizdiń dáýirimizdiń, bizdiń urpaqtyń ıesine tıgen zor baqyt», - dep atap ótti Qýanysh Sultanov. Onyń aıtýynsha, Memlekettik shekarany kórshilesterimizben kelisip zańdastyrýdy N. Nazarbaev 1991 jyly 16 jeltoqsan kúni QR Memlekettik táýelsizdik týraly zańdy qabyldap jatqan tusta tuńǵysh ret jarııalap edi. Sodan beri bul salaǵa memlekettik ınstıtýttardyń barlyǵy jumyldyryldy. 20 jyldyń ishinde osyndaı baǵyttaǵy jumystar sapaly atqarylyp, BUU tarapynan eldigimiz moıyndaldy. Buǵan Tuńǵysh Prezıdenttiń eńbegi men qaıratkerligi orasan zor septik boldy.
Sonymen qatar, depýtat Q. Sultanov shekara máselesiniń búgingi ózekti tusyna toqtala kele, buryn boljanbaǵan jańa qaterler eldiń qaýipsizdigin qamtamasyz etýde kóptegen sharalardy qataıtýdy talap etetindigine aıryqsha nazar aýdardy. «Shekaralyq óńirler men aımaqtarǵa Úkimet aıryqsha mán berip, oǵan qarjylyq kómekti basymdyqpen qarastyrǵany jón bolar edi. Shekara qyzmetiniń mártebesin kóterý maqsatynda salanyń áleýmettik-tehnıkalyq jabdyqtalýyn zamana talabyna saı túbegeıli ózgertý qajet. Óıtkeni, shekaradaǵy baılanys quraldarynan bastap, tehnıkalyq jabdyqtaý sharalary múldem búgingi talapqa saı kelmeıdi», - deıdi depýtat.
Sonymen qatar, shekaralyq qyzmet mártebesin kóterý sharalaryna toqtalǵan Qýanysh Sultanuly, jastardy shekaralyq áskerı qyzmetke erekshe talappen tańdaý qajettigin alǵa tartty. «Buǵan otanshyldyǵy, óziniń yqylasy bar jastardy tańdaýdy jolǵa qoıý qajet. Bul álemdegi shekara qyzmetterdiń tájirıbesinde bar dúnıe. Jalpy shekaralyq qyzmet degenniń ózi otanshyldyq tárbıesi bolýy shart. Shekarashylardyń ózderi óz qyzmetterin qurmettep, jaýapkershil bolýlary kerek. Biz olarmen kezdeskende keıbireýler tipti súleı-sapa, bar-joqtyń ortasynda júrgenin de ańǵardyq. Al shekaralyq qyzmet erekshe harızmany, erekshe kózqarasty qajet etetin qyzmet bolýy shart», - dedi Q. Sultanov.
