Jastardy patrıottyq rýhta tárbıeleıtin tyń dúnıeler jasaýǵa shaqyrar edim - B. Saparbaev
ASTANA. QazAqparat - Búgin Astanadaǵy Ulttyq akademııalyq kitaphanada Qazaqstan Respýblıkasy Premer-mınıstriniń orynbasary Berdibek Saparbaev elimizdegi birqatar shyǵarmashalyq uıym ókilderimen kezdesti. Jıynǵa Parlament depýtattary da qatysty.
Shara barysynda búgingi tańdaǵy shyǵarmashylyq odaqtardyń, óner ujymdarynyń ózekti máseleri talqylandy. Sonymen qatar, zııaly qaýym sanatyndaǵy birqatar azamattarǵa, shyǵarmashylyq uıymdar múshelerine «Mádenıet salasynyń úzdigi» tósbelgileri tabys etildi.
«Ásili Otandy jyrlaýdan asqan mindet joq. Sondyqtan da elimizdegi shyǵarmashylyq odaqtarǵa, óner ujymdaryna qazirgi zaman talabyna saı, Qazaqstannyń jetistikterin jyrlaıtyn, jastardy patrıottyq rýhta tárbıeleıtin tyń dúnıeler jasaýǵa shaqyrar edim. Sondaı-aq shyǵarmashylyq orta, zııaly qaýym, jazýshylar men óner adamdary bıylǵy jyly toılanatyn Qazaq handyǵynyń 550 jyldyǵyn, Qazaqstan Respýblıkasy Konstıtýtsııasy men Qazaqstan halqy Assambleıasynyń 20 jyldyqtaryn, Uly jeńistiń 70-jyldyǵyn atap ótýge belsene qatysýlary kerek», dedi B. Saparbaev.
Sóz arasynda Premer-mınıstrdiń orynbasary Mádenıet jáne sport mınıstrligine shyǵarmashylyq odaqtarmen tyǵyz baılanysta jumys jasap, Elbasynyń «Máńgilik el» ıdeıasy jáne «Nurly jol» baǵdarlamasy aıasynda júktelgen mindetterdi birlese atqarýdy tapsyrdy.
