Jastardy qoldaýda Qazaqstan AÓІSShK elderi ishinde kósh ilgeri tur

ASTANA. 8 maýsym. QazAqparat - Qazaqstannyń jastar saıasaty AÓІSShK elderi arasynda eń úzdigi sanalady. Bul týraly búgin «Respýblıkalyq saıyskerler qaýymdastyǵynyń» basshysy Erkebulan Muqanov málim etti.

«Qazaqstan AÓІSShK elderi ishinde kósh ilgeri tur. Ol memleketterde bizdegideı jastar saıasaty joq. Uıymǵa múshe-elderdiń jastary búginde Astanadaǵy halyqaralyq konferentsııada bas qosyp, ózderinde jastardy qoldaý salasynda bolyp jatqan sharalarmen tanystyrýda, ózekti problemalarymen bólisýde. Qarap otyrsaq, olarǵa qaraǵanda, Qazaqstanda áldeqaıda qolaıly sharttar jasalǵan. Qazaqstan kóshbasshy, bizde abyroımen aıta alatyndaı jetistikterimiz bar», - deıdi E. Muqanov agenttik tilshisine bergen suhbatynda.

«Mysaly, Ázirbaıjanda tek 120 jastar uıymy bar. Bizdiń elde olardyń sany 10 myńnan asyp jyǵylady. Qarjylandyrý kólemi de birneshe ese joǵary. Bıyl jastar saıasaty komıteti qurylǵaly jatyr. Kelesi jyldan bastap qarjylandyrý somasy taǵy da ulǵaıatyndyǵy anyq», - dep túıindedi sózin ol.