Jastardy qoldaý, aýyldy damytý: Altaı Kólginov Qyzylorda oblysynyń turǵyndarymen kezdesti
Prezıdent tapsyrmalaryn oryndaý aıasynda bilim berý, densaýlyq saqtaý jáne jumyspen qamtý máseleleri erekshe baqylaýda. Mektep tapshylyǵy «Jaıly mektep» ulttyq jobasy men «Bilim berýdi qoldaý» qorynyń kómegimen sheshiletin bolady. Sonyń nátıjesinde úsh jyl ishinde óńirde 30-dan astam bilim berý nysanyn salý mejelengen.
Qyzylorda oblysynda medıtsınalyq qyzmet kórsetý sapasyn jaqsartý úshin bıyl oblystyq qan ortalyǵy men mamandandyrylǵan emhanasy bar 300 oryndyq (onkologııalyq bólimshesi bar) kópsalaly aýrýhana, Aral aýdany Sekseýil aýylynda 40 tósektik aýrýhana qurylysyn salý josparlanǵan.
Jastardy jumyspen qamtý – Qyzylorda oblysyndaǵy ózekti máselelerdiń biri. Jastar resýrstyq ortalyǵynda ótken kezdesýde memleket usynǵan múmkindikter týraly aıtyldy. Atap aıtqanda, jumysqa ornalasýǵa járdemdesý barysynda jalaqyny sýbsıdııalaıtyn «Birinshi jumys orny» jáne oqý protsesinde eńbek tájirıbesin jınaýǵa kómektesetin «Jastar praktıkasy» jobalary iske qosyldy. «Agrarlyq nesıe korporatsııasy» AQ 5-7 jyldan aspaıtyn merzimge, jyldyq 2,5% bastap, ıkemdi sharttarmen 5 mln teńgege deıin nesıeler berý arqyly jastardyń kásipkerlik bastamalaryn qoldaıdy. Qyzylorda oblysynda 2023 jyly osyndaı jobalardy iske asyrýǵa 1,2 mlrd teńge bólý josparlanyp otyr. Qazirgi ýaqytta 7 ótinim maquldandy. Bıznesti damytýdyń taǵy bir tásili – halyqtyń áleýmettik turǵydan qorǵalmaǵan toptary úshin óteýsiz grant tabystaý.
A. Kólginov jastarmen belsendi jumys júrgizý, jastarǵa baǵyttalǵan qoldaýdyń barlyq tetikteri týraly túsindirme jumystaryn júrgizý qajettigine toqtaldy.
«Elimizde Memleket basshysynyń tapsyrmasy boıynsha jastar máselelerin sheshýdiń pármendi tetikteri engizildi: jastardy oqytý, jumysqa ornalastyrý, óz isin ashýǵa kómektesý, turǵyn úı satyp alýyna járdemdesý jáne t. b. Kóbinese jastar ózderine berilgen mundaı múmkindikter týraly bilmeıdi. Aqparattandyrýdyń, keri baılanys ornatýdyń barlyq tásilderin qoldaný qajet. Óıtkeni jastardy qoldaýǵa qarajat qarastyrylyp, tolyq kólemde bólinetin bolady», — dep atap ótti Premer-Mınıstr orynbasary.
«Aýyl amanaty» baǵdarlamasy aýyl turǵyndaryn jumyspen qamtýǵa baǵyttalǵan. Ony Qyzylorda oblysynda júzege asyrýǵa 2023 jyly 3 mlrd teńge qarastyrylǵan.
Vıtse-premer Qyzylorda qalasyna qarasty Baımurat batyr aýyly turǵyndarymen kezdesip, baǵdarlamanyń sharttaryna toqtaldy.
«Aýyl amanaty» baǵdarlamasy aýyl turǵyndaryna óz bıznesin bastaýǵa nemese burynnan bar bıznesti damytýǵa múmkindik beredi. Ol úshin jeńildikpen nesıe mólsherlemesi engizildi, bıýdjetten qomaqty qarajat bólinýde. Aýyl turǵyndarynan talap etiletin basty nárse – bastama kóterý men jumys isteýge degen umtylys. Aýylda jaıly ómir súrý úshin jaǵdaı jasalýda: mektepter, aýrýhanalar, joldar, ınjenerlik ınfraqurylym salynýda. «Aýyl amanaty» baǵdarlamasy – aýyl turǵyndarynyń ómir súrý deńgeıin jaqsartýdyń taǵy bir qadamy», — dep atap ótti Úkimet basshysynyń orynbasary.
