Jastardy aýylǵa baǵyttaý úshin medıtsınalyq oqý oryndaryna otansúıgishtikke tárbıeleý mindeti qoıyldy
ASTANA. Qazannyń 21-i. QazAqparat /Rýslan Ǵabbasov/ - Jastardy aýylǵa baǵyttaý úshin medıtsınalyq oqý oryndarynda otansúıgishtikke tárbıeleý mindeti qoıyldy. Bul týraly búgin QR Parlamentinde «Medıtsınalyq jáne pedagogtyq kadrlardy aýyldyq jerlerge bekitýdiń jaǵdaıy jáne oǵan qajetti sharalar týraly» ótken otyrysta Densaýlyq saqtaý mınıstrliginiń Jaýapty hatshysy Bolat Sadyqov málim etti.
«Búginde biz joǵary oqý oryndarynyń rektorlary aldyna Qazaqstannyń densaýlyq saqtaý júıesindegi otansúıgishtik túsinigin tárbıeleý turǵysynda qatań mindet qoıdyq. Sondyqtan túlektermen nasıhat jumystaryn júrgizý úshin bul ıdeologııany rektorlarǵa deıin jetkizýdemiz», - dedi Jaýapty hatshy.
B. Sadyqov qazirgi kezde aýyldyq jerdiń densaýlyq saqtaý júıesinen ótý ár dárigerdiń boryshy ekenin stýdentterge keńinen nasıhattaý sharalary atqarylyp jatqandyǵyn jetkizdi.
«2-3 jyldan beri jas mamandardyń aýylda úsh jyldyq merzimde jumys isteýin zańnamalyq túrde bekitý máselesi kóterilýde», - dedi B. Sadyqov. Osy oraıda mysal retinde buryndary úsh jyldyq jumyspen óteýge aýyldyq jerlerge jiberilgen kezder bolǵanyn eske salyp ótti.
