Jastardy áskerı boryshyn óteýge yntalandyrýdy oılastyrýymyz kerek – Prezıdent

NUR-SULTAN. QazAqparat – Memleket basshysy Qasym-Jomart Toqaev Májilis otyrysynda jastardyń áskerı boryshyn óteýden qashatynyn synǵa aldy, dep habarlaıdy QazAqparat.

«Basa nazar aýdarýdy qajet etetin taǵy bir másele bar. Kóptegen jas azamatymyz Qarýly kúshter qataryna áskerı boryshyn óteýden qashady. Áskerı bıletke ıe bolý jastardyń maqtanyshyn týdyrmaıdy jáne Otanǵa qyzmet etýdiń belgisi sanalmaıtyn boldy. Armııa qatarynda qyzmet etý, quqyq qorǵaý salasynda jumys isteý – aıryqsha mıssııa. Bul Otan úshin janyn salýǵa bel býǵan azamattardyń sanaly tańdaýy. Jastarymyzdy áskerı boryshyn óteýge qalaı yntalandyrýǵa bolatynyn búkil qoǵam bolyp oılastyrýymyz kerek», - dedi Memleket basshysy.

Óz sózinde Q. Toqaev myqty halyq ekenimizdi, tól tarıhymyzda talaı jaýgershilik zamandy, asharshylyqty jáne basqa da alapat qıyndyqty bastan ótkergenimizdi basa aıtty.

«Sońǵy kúnderdegi qaıǵyly oqıǵalar biz úshin taǵy bir synaq boldy. Ony eńserip, burynǵydan da myqty bolamyz», - dedi Prezıdent.