Jastardy arandatýshylyq áreketterge ermeýge shaqyramyn - Aqjúrek Tańatarov

«Jalpy, bizdiń halqymyz qonaqjaıly, barshamyzdyń boıymyzda keńshilikti, baýyrmaldyqty tý etip ustanatyn minezimiz bar. Qordaı aýdanynyń da turǵyndaryn jaqsy bilemin, mundaıda janjalǵa bara bermeıtin adamdar. Ókinishke qaraı, keleńsiz oqıǵa oryn alypty. «Jaman ult joq, jaman adamdar bar» deıdi ǵoı, sol sebepti sabyrsyzdyq tanytqan bir-eki adam úshin mundaı qaıǵyly jaǵdaıǵa jol berildi. Osy oraıda halqymyzdy, oblystyń ári aýdannyń turǵyndaryn sabyrlyqqa shaqyramyn. Osyndaı daý-damaıǵa kirgizgen adamdar óziniń jazasyn alady dep oılaımyn. Prezıdent tapsyrmasy boıynsha Úkimet komıssııasy quryldy ǵoı. Endi bul baǵytta tártipke salyp, kim qandaı jazaǵa tartylatynyn quzyretti organdar óziniń baǵasyn beredi dep oılaımyn», - dedi A. Tańatarov.

Bul turǵyda sportshy óńir jastaryn arandatýshylyq áreketterge ermeýge shaqyrdy.

«Kez kelgen búlikti toqtatýda aqsaqaldarymyzdyń aıtqan salmaqty sózi durys bolady dep oılaımyn. Biz úlkenge qurmet kórsetip kele jatqan halyqpyz ǵoı. Sol sebepti aqsaqaldarymyz shyǵyp, sabyrǵa shaqyrsa, tıisti nátıje bolady dep paıymdaımyn», - dedi Aqjúrek Tańatarov.

Buǵan deıin Jambyl oblysynyń Qordaı aýdanyndaǵy Masanchı aýylynyń turǵyndary arasynda jappaı tóbeles bolǵanyn habarlaǵan bolatynbyz.

Kóp ótpeı Prezıdent Qasym-Jomart Toqaev Jambyl oblysy Qordaı aýdanynda bolǵan jappaı tóbeleske qatysty pikir bildirdi. «Jambyl oblysy Qordaı aýdanynda buzaqylyq sıpattaǵy jappaı tóbeles boldy. Ony arandatýshylar óz paıdasyna qoldanbaq bolǵan. Polıtsııa jaǵdaıdy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady» dep jazdy Qasym-Jomart Toqaev Twitter-degi paraqshasynda.

Al búgin Memleket basshysy Jambyl oblysyndaǵy oqıǵaǵa baılanysty málimdeme jasady.