Jastardyń tártibi men jaýapkershiligin arttyratyn jańa baǵdarlama ázirlene me — Bektenov jaýaby

ASTANA. KAZINFORM — Premer-mınıstr Oljas Bektenov Senat depýtattarynyń jastar arasynda tártip pen jaýapkershilikti arttyratyn jańa baǵdarlama ázirleý usynysyna jaýap berdi.

— Jastar arasynda tártip pen jaýapkershilikti nyǵaıtý, sondaı-aq bilim berý ortasynda otbasylyq tárbıe men adamgershilik-etıkalyq qundylyqtardy ilgeriletý maqsatynda 2023 jyldan bastap «Birtutas tárbıe» baǵdarlamasy iske asyrylyp jatyr. Baǵdarlama 6 negizgi qundylyqqa negizdelgen: táýelsizdik pen patrıotızm, birlik pen kelisim, ádildik pen jaýapkershilik, zań men tártip, eńbekqorlyq pen kásibılik, jasampazdyq pen ınnovatsııa. Baǵdarlamany Oqý-aǵartý mınıstrligi 10 memlekettik organmen birlesip iske asyrady, — dedi Oljas Bektenov.

Onyń atap ótýinshe, oqý jylynyń basynan beri baǵdarlama aıasynda 1 mln-ǵa jýyq synyp saǵaty jáne 46,8 myńnan astam synyptan tys is-shara ótkizildi.

— Bilim alýshylardy qamtý 100 paıyzdy qurady. Baǵdarlamanyń maqsaty — tereń bilimdi, eńbek etıkasyn ustanatyn, adal, ulttyq jáne ámbebap qundylyqtardy qurmetteıtin, ádil qoǵamnyń damýyna úles qosýǵa daıyn tulǵany tárbıeleý. Prezıdenttiń tapsyrmasy boıynsha 2025 jylǵy 14 naýryzda ótken Ulttyq quryltaıdyń IV otyrysynda baǵdarlama ataýy «Adal azamat» dep ózgertildi, — dedi ol.

Oljas Bektenov Prezıdenttiń tapsyrmalaryn oryndaý úshin 2025 jylǵy 14 naýryzdan bastap Oqý-aǵartý mınıstrligi balalardyń quqyqtaryn keshendi qorǵaýǵa baǵyttalǵan «Qazaqstan balalary» biryńǵaı baǵdarlamasyn ázirleýge kiriskenin atap ótedi. Baǵdarlamada mynadaı 7 basym baǵyt anyqtalǵan: 

• Otbasy — balanyń ál-aýqatynyń negizi; 
• Bilim alý quqyǵy; 
• Medıtsınalyq kómek alý quqyǵy;
• Balalary bar otbasylardy áleýmettik qoldaý; 
• Býllıngten, zorlyq-zombylyqtan jáne basqa táýekelderden qorǵaý;
• Infraqurylymdyq qaýipsizdik; 
• Bos ýaqyt, sport jáne qosymsha bilim alý quqyǵy.

— Joǵaryda atalǵan bastamalardyń iske asyrylýyn eskere otyryp, qazirgi ýaqytta jekelegen jańa tárbıe baǵdarlamasyn ázirleýdiń qajettiligi baıqalmaıdy, — dedi premer-mınıstr.

Esterińizge sala ketsek, senator Gennadıı Shıpovskıh jastar arasynda tártip pen jaýapkershilikti kúsheıtetin, ıaǵnı otbasylyq tárbıe men mekteptegi moraldyq-etıkalyq qundylyqtarǵa negizdelgen jańa baǵdarlamalar ázirleý qajettigin kóterip, Úkimet basshysynyń atyna depýtattyq saýal joldaǵan edi.