Jastardyń eńbek naryǵyna kelýi jylyna 360 myń adamǵa deıin ósedi
ASTANA. KAZINFORM — Jarty jylda jumyssyzdyq deńgeıi 4,6% mólsherinde saqtaldy. Bul týraly búgin Úkimet otyrysynda Eńbek jáne halyqty áleýmettik qorǵaý vıtse-mınıstri Asqar Bıahmetov málim etti.
— Birinshi jartyjyldyqtyń qorytyndysy boıynsha eńbek naryǵynda turaqtylyq baıqaldy jáne jumyssyzdyq deńgeıi 4,6% mólsherinde saqtaldy. Jumyspen qamtylǵandardyń ósýin jaldamaly jumyskerler qamtamasyz etti, olardyń sany 7,1 mıllıon adamǵa jetti, al ózin-ózi jumyspen qamtyǵandardyń sany — 2,1 mln adam, — dedi Asqar Bıahmetov.
Sonymen qatar ol qazirgi negizgi trendterge toqtaldy. Birinshiden, bul baǵytta tsıfrlandyrý jáne avtomattandyrý. Kásipterdiń kóbi tsıfrlyq quzyretti talap etedi. Ekinshiden, platformaly jumyspen qamtý jáne elektrondyq saýda — adamdardyń kópshiligi onlaın-platformalar arqyly jumys isteıdi, frılanspen, elektrondyq saýdamen aınalysady.
— Úshinshiden, halyq sany ósip keledi. Nátıjesinde, jastardyń eńbek naryǵyna kelýi jyl saıyn artyp otyr. Boljam boıynsha 2035 jylǵa deıin jylyna 360 myń adamǵa deıin ósedi. Bul eńbek naryǵyna qosymsha salmaq túsiredi. Biz ıkemdi jáne zamanaýı eńbek naryǵyn qurý úshin qazirden bastap bul trendterdi eskerýimiz kerek. Jumyspen qamtý qurylymy árdaıym ekonomıkanyń suranystaryna sáıkes kele bermeıdi. Ózektiligin joǵaltyp bara jatqan kásipter bar. Eńbek naryǵynda suranysqa ıe tıisti daǵdylary bar kadrlar jetispeıdi. Sonymen qatar, óńirlik teńgerimsizdik bar: ońtústikte eńbek resýrstary shamadan tys kóp bolsa, soltústikte — olar jetispeıdi. Іri megapolısterde ishki kóshi-qonnyń joǵary deńgeıine baılanysty eńbek naryǵynyń asyra tolyǵýy tirkeldi. Bul áleýmettik, turǵyn-úı, kommýnaldyq jáne kólik ınfraqurylymdaryna edáýir júkteme túsirip jatyr, — dedi vıtse-mınıstr.
Onyń aıtýynsha, taǵy bir syn-qater kóleńkeli ekonomıkaǵa qatysty. 2024 jyldyń qorytyndysy boıynsha jumyspen qamtylǵan halyqtyń 30 paıyzǵa jýyǵy zeınetaqy júıesine qatyspaǵan. Jekelegen sektorlarda eńbek normatıvteriniń bolmaýy da kóleńkeli jumyspen qamtýdyń saqtalýyna yqpal etip otyr.
Eske salsaq, Qazaqstannyń eńbek naryǵyna jasandy ıntellekt qalaı áser etetinin jazǵan edik.