Jastardyń belsendiligi nazar aýdartty: Quryltaı saılaýyndaǵy qoǵamdyq baıqaý qorytyndysy
ASTANA. KAZINFORM — «DAÝYS» qoǵamdyq baıqaýshylar koalıtsııasy Quryltaı depýtattaryn saılaýǵa júrgizilgen monıtorıngtiń aldyn ala qorytyndysyn jarııalady. Saılaý kúni el boıynsha koalıtsııanyń 25 myńnan astam baıqaýshysy jumys istegen.
Koalıtsııa tóraǵasy Tólegen Kúnádilovtiń aıtýynsha, saılaý protsesi jalpy alǵanda tynysh jaǵdaıda ótken. Ýchaskelerdiń basym bóliginde belgilengen rásimder saqtalyp, saılaý komıssııalary men qoǵamdyq baıqaýshylardyń ózara jumysy talapqa saı júrgizilgen.
— Júıeli daıyndyq qoǵamdyq baıqaýǵa biryńǵaı kásibı kózqaras qalyptastyrýǵa múmkindik berdi. Baıqaýshylar óz ókilettikterin túsinip, ýchaskelerdegi ahýaldy obektıvti túrde tirkeı aldy. Erekshe nazar aýdarýdy qajet etetin nemese osy naýqannyń ádil ári ashyq ótýine kúmán keltiretin zań buzý bolǵan joq, — dedi Tólegen Kúnádilov.
Baıqaýshylar kún boıy saılaýshylardyń turaqty legin tirkegen. Koalıtsııa ókilderi daýys berýge jastardyń belsendi qatysqanyn erekshe atap ótti.
— Saılaýshylar arasynda jastardyń kóp bolǵany nazar aýdartady. Bul olardyń eldiń qoǵamdyq-saıası ómirine qyzyǵýshylyq tanytyp, Qazaqstannyń bolashaǵyn qalyptastyrýǵa qatysýǵa daıyn ekenin kórsetedi, — dedi koalıtsııa tóraǵasy.
Saılaýǵa deıin baıqaýshylar bir aı boıy arnaıy daıyndyqtan ótken. Olarǵa saılaý zańnamasy, quqyqtary men mindetteri, daýys berý jáne daýystardy sanaý tártibi túsindirilgen.
Monıtorıng barysynda ýchaskelerdiń múgedektigi bar jáne júrip-turýy shekteýli azamattar úshin qoljetimdiligi de baǵalandy. Baıqaýshylar pandýstardyń, arnaıy kabınalar men aqparattyq materıaldardyń bolýyna nazar aýdarǵan.
Qazir koalıtsııa óńirlerden túsken málimetterdi jınaqtap jatyr. Materıaldar tolyq óńdelgennen keıin qoǵamdyq baıqaýdyń qorytyndy taldamalyq esebi jarııalanady.
Aıta ketelik Táýelsiz Memleketter Dostastyǵynyń baıqaýshylar mıssııasy 23 tamyzda ótken Quryltaı depýtattarynyń saılaýyn baqylaý qorytyndysyn shyǵardy.
