Jastardyń belsendi bolýy el bolashaǵy úshin mańyzdy – sarapshylar pikiri
ASTANA. KAZINFORM – Referendým kúni Jibek Joly radıosynyń efıri el bolashaǵyna qatysty ashyq pikir almasý alańyna aınaldy. Efır barysynda bılik ókilderi, qoǵamdyq uıymdar men medıa salasynyń mamandary óz oılaryn ortaǵa saldy. Spıkerler azamattyq jaýapkershilik, ulttyq qundylyqtar men memlekettiń qoǵamdyq-saıası sheshimderine qatysýdyń mańyzyn atap ótti, dep habarlaıdy Kazinform agenttiginiń tilshisi.
Stýdııa qonaqtarynyń biri – Senat depýtaty Evgenıı Bolgert. Ol árbir azamattyń ómirine tikeleı áser etetin ózekti zańnamalyq máseleler men memlekettik bastamalar týraly pikir bildirdi.
Áńgime tek qazirgi zań jobasymen shektelmeı, el damýynyń strategııalyq baǵyttaryn da qamtydy. Spıker jańa normalardyń áleýmettik salaǵa, ekonomıkaǵa jáne memlekettik basqarý júıesine yqpaly jóninde jan-jaqty túsindirdi. Sondaı-aq quqyqtyq mádenıetti damytý jáne zańnamalyq ózgeristerdi talqylaýǵa qoǵamdy keńinen tartý qajet ekenin atap ótti.
Efır barysynda azamattyq jaýapkershilik pen sanaly tańdaý jasaý máselesi de talqylandy. «Assambleıa jastary» RQB tóraǵasy Tımýr Jumyrbaevtyń aıtýynsha, búginde jastardyń daýys berýi tek ózderi úshin ǵana emes, tutas memleket úshin de mańyzdy faktorǵa aınalyp otyr.
– Azamattardyń óz jaýapkershiligin tereń túsinip, daýys berýdiń mańyzyn sezine bastaǵany qýantady. Ásirese bul jas urpaq úshin asa qajet. Daýys berý kezinde sanaly tańdaý jasaý olardyń jeke ómiri men kásibı baǵytyn ǵana emes, tutas qoǵamnyń damýyn da aıqyndaıdy, - dedi ol.
Sondaı-aq Jibek Joly Radio mobıldi stýdııasynda Amanat partııasynyń hatshysy Aleksandr Danılov suhbat berdi. Spıker partııanyń negizgi bastamalary, el damýynyń jańa baǵyttary syndy ózekti máselelerge toqtaldy.
– Jańa býyn ómirdiń mánin izdeýge kóbirek umtylady, sondyqtan olardyń naqty qundylyqtary bolǵan jón. Dál osy qundylyqtar jónindegi suraqtarǵa jaýap izdeý barysynda olar azamattyq jáne saıası pikirtalastarǵa qatysady. Anyq aıtsaq, olardyń belsendiligi tek arta beredi, jáne biz ony barynsha qoldaýǵa tıispiz. Óz pikirin ashyq bildirip, qoǵamdyq ómirge belsendi aralasatyn azamattar neǵurlym kóp bolsa, bul elimizdiń damýyna soǵurlym oń áser etedi, - dedi Aleksandr Danılov.
Aıta keteıik, Jibek Joly radıosynda áıelderdiń qoǵamdaǵy kóshbasshylyq róli jaıynda Májilis depýtaty Qaraqat Ábden de suqbat berdi.
