Jastardyń basym kópshiligi ásiredinshildikti, ásireultshyldyqty qoldamaıdy — Memleket basshysy

ASTANA. KAZINFORM — Órkenıetti ári ozyq eldiń zańy — ádil, bıligi — bilikti, al azamattary sanaly jáne belsendi bolary haq. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.

— Qazirgi kókiregi oıaý jas urpaq otanshyldyq degen sózdi basqasha qabyldaıdy. Jastardyń basym kópshiligi ásiredinshildikti, ásireultshyldyqty qoldamaıdy. Olar úshin patrıotızmniń basty kórsetkishi — jasampazdyq pen jańashyldyq. Jastar «Eldi súıý degenimiz — halyqqa paıdasy tıetin jańalyq ashý, jańa is bastaý» dep túsinedi. Olar Qazaqstandy damyǵan, kórkeıgen memleket retinde kórgisi keledi. Zamanaýı tehnologııalardy meńgerip, halqymyzdy ozyq oıly ulttardyń qataryna qosýǵa talpynady, — dedi Prezıdent.

Memleket basshysynyń atap ótýinshe, óskeleń urpaqtyń boıyndaǵy patrıotızm — bolashaqqa degen shynaıy umtylys. Bul — qoǵam sanasynda bolyp jatqan ózgeristiń aıqyn kórinisi.

— Men muny tolyǵymen qoldaımyn. Jastardyń kúsh-jigerine, olardyń daryny men bilimine senemin. Biz keshe kim bolǵanymyzdy umytpaımyz. Tól tarıhymyzǵa qurmetpen qaraımyz. Al keleshekte kim bolatynymyz tek qana óz qolymyzda ekenin jaqsy túsinemiz. Sondyqtan ǵylym-bilimge umtylǵan, elin-jerin kórkeıtýdi oılaǵan jastarǵa árdaıym jan-jaqty qoldaý kórsete beremiz. Biz qolǵa alǵan aýqymdy jumystyń bári jastardyń jarqyn bolashaǵy úshin jasalyp jatyr. Óskeleń urpaq erteń sonyń ıgiligin kóredi, ony eselep, laıyqty jalǵastyrady, — dedi Qasym-Jomart Toqaev.

Prezıdent qazir jer júzinde bolyp jatqan túbegeıli ózgeristerge jastar tez beıimdeletindigin aıtty.

— Sonyń ishinde jasandy ıntellektiniń jańa dáýirdegi orny erekshe. Hakim Abaı «Adamnyń adamshylyǵy aqyl, ǵylym, jaqsy ata, jaqsy ana, jaqsy qurby, jaqsy ustazdan bolady» dep aıtqan. Bul naqyl sózge Memleket basshysy retinde qosarym: Órkenıetti ári ozyq eldiń zańy — ádil, bıligi — bilikti, al azamattary sanaly jáne belsendi bolary haq. Memleket deńgeıinde qabyldanǵan árbir sheshimniń mán-mańyzy, eń aldymen, halyqtyń turmysyn jaqsartý, ekonomıkany turaqtandyryp, áleýmettik ádildik ornatý úshin jasalǵan naqty istermen ólshenýge tıis. Sonda biz jańa turpatty, myqty el bolamyz. Qazaqstan jan-jaqty, túbegeıli reformalardyń arqasynda damýdyń dańǵyl jolyna túsip keledi. Alda qarqyndy jumys kútip tur. Biz baǵdarymyzdan aınymaı, tek alǵa qadam basýymyz kerek, — dedi Memleket basshysy.

Aıta keteıik, búgin Prezıdent bir palataly Parlament qurý úshin 2027 jyly jalpyulttyq referendým ótkizýdi usyndy.

Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.

Kazinform saıty tikeleı efırmen qatar, jazbasha translıatsııa da jasaıdy.

Sondaı-aq Joldaý mátinin agenttiktiń telegram arnasynan oqýǵa bolady.