Jastardy jat aǵymnan qalaı qorǵaımyz - Bas múftıdiń jaýaby
TAShKENT. KAZINFORM – Ózbekstanda «Islam - beıbitshilik pen izgilik dini» atty dinbasylardyń halyqaralyq forýmy ótip jatyr, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Atalǵan is-sharaǵa 20-dan asa elden kelgen bas múftıler, ǵalymdar men ustazdar qatysýda. Olar ıslam dininiń tynyshtyq pen izgilikke úndeıtin qaǵıdasyn nasıhattaýǵa qatysty oı-pikirin ortaǵa salyp, usynystar ázirleýge nıetti.
Forýmǵa Qazaqstan tarapynan qatysyp jatqan Bas múftı Naýryzbaı qajy Taǵanuly ıslam dini jergilikti halyqtyń salt-dástúrimen bite qaınasyp, sol arqyly adamzatty aýyzbirshilikke shaqyrýy tıis ekenin atap ótti.
«Ár qatysýshy óz baıandamasynda ıslamnyń beıbitsúıgish din ekenin, onyń birlikke shaqyratynyn aıtty. Taıaýda biz Astana qalasynda halyqaralyq forým uıymdastyrdyq. Onyń barysynda biz mańyzdy qujattardy qabyldadyq. Sonyń biri – «Islam jergilikti halyqtyń dástúrin qoldaıdy» degen qujat. Bul - ıslam dini ár el turǵyndarynyń ǵurpyn saqtaýdy quptaıtynyn aıǵaqtaıdy», - dedi Naýryzbaı qajy Taǵanuly Kazinform tilshisiniń saýalyna jaýap bere otyryp.
Osy oraıda Bas múftı jastardy jat dinı aǵymdardan qorǵaýda negizge alynýy qajet qaǵıdaǵa toqtaldy. Bul baǵyttaǵy qaterlerdiń aldyn alý úshin óskeleń urpaq ata-baba salǵan sara joldan adaspaýy tıis.
«Islam dini halqymyzdyń salt-dástúrimen birigip ketti dep aıtýǵa bolady. Sondyqtan qazir jastardy jat aǵymdardyń yqpalynan saqtaý úshin ata-babamyzdyń jolyn berik ustaný kerek. Osylaısha, biz qaterdiń aldyn alamyz. Qazir aqparattyq tehnologııalar damyǵan zaman. Osyǵan baılanysty zerttelgen, anyqtalǵan shynaıy aqparatqa erýimiz kerek. Bizdiń ata-babamyz álem moıyndaǵan ǵalymdar bolǵan. Tıisinshe, solardyń sara jolyn ustanyp, salt-dástúrden ajyramaý mańyzdy», - dep pikir bildirdi Bas múftı.
QMDB tóraǵasynyń aıtýynsha, forým qoryndysy boıynsha jan-jaqty baǵalaýǵa negizdelgen taldaý jasalyp, naqty usynystar ázirleý josparlanyp otyr.
«Іs-sharaǵa qatysyp jatqan dinbasylardyń baıandamasy men usynysy negizinde qorytyndy jasalady. Onyń ishinde ıslam dininiń beıbitshilik pen tynyshtyqty nasıhattaıtyn sıpatyna saı, tıisti qujattar qabyldaý josparlanǵan», - dep túıindedi Naýryzbaı qajy Taǵanuly.
Qosa ketsek, taıaýda Senat tóraǵasıa Máýlen Áshimbaev jas dinı kóshbasshylardy jalǵan aqparatpen belsendi kúresýge shaqyrdy.
Sondaı-aq, elordada Álemdik jáne dástúrli dinder kóshbasshylary seziniń Іzgi nıet elshileri ınstıtýty quryldy.
