Jastardy tolǵandyratyn túıtkilderdiń sheshimin birlesip izdeý qajet - Prezıdent

ASTANA. KAZINFORM – Jastardyń nanym-senimi, dúnıetanymy ártúrli bolsa da olardy tolǵandyratyn máseleler ortaq. Bul týraly Álemdik jáne dástúrli dinder kóshbasshylary VIII Ceziniń jalpy otyrysynda Memleket basshysy Qasym-Jomart Toqaev aıtty.

- Shyn máninde bolashaq jastardyń qolynda. Óskeleń urpaq barlyq din jáne mádenıet ókilderiniń arasyndaǵy ózara qurmet pen syılastyq rýhyn tereń sezinip ósýi qajet. Qazirgi jastar kóptegen syn-qatermen betpe-bet kelip otyr. Nanym-senimi, dúnıetanymy ártúrli bolsa da olardy tolǵandyratyn máseleler ortaq. Demek, sol túıtkilderdiń sheshimin de birlesip izdeý qajet, - dedi Prezıdent.

Memleket basshysynyń aıtýynsha, osy maqsatta sezd aıasynda Jas din kóshbasshylary forýmy ekinshi ret ótkizilip jatyr. Ol forýmǵa qatysýshylar ashyq pikir almasýǵa, birlesip jumys isteýge daıyn ekenin kórsetti.

- Bárimiz rýhanı kóshbasshylardyń jańa býyny qalyptasyp jatqanyn kórip otyrmyz. Olarǵa qoldaý kórsetý barshamyzǵa ortaq paryz. Qazaq halqynda «tórteý túgel bolsa, tóbedegi keledi» degen sóz bar. Shyn máninde bárimiz kúsh-jigerimizdi biriktirsek, jahandyq syn-qaterlerge tótep bere alamyz. Biz Astana tórinde osymen 8-shi márte bas qosyp otyrmyz. Bul din basshylarynyń arman-muraty ortaq ekenin ańǵartady. Búkil adamzatqa tóngen túrli qaýipterge birigip qarsy turýǵa daıyn ekenin kórsetedi. Osy dóńgelek ústeldegi qurmet pen dostyq rýhy dúnıe júzin yntymaqqa bastasyn», - dedi Qasym-Jomart Toqaev.

Buǵan deıin Astanada Álemdik dinder kóshbasshylarynyń sezi bastalǵanyn jazǵan edik.