Jastardy burmalanǵan taıaz dinı túsinikterge buryp áketý áreketteri jalǵasyp jatyr - senator
Dinı bilim izdenýshilerdiń 75 paıyzy ashyq ınternet resýrstardy paıdalanady. Bul týraly Senattyń jalpy otyrysynda depýtat Nurtóre Júsip aıtty, dep habarlaıdy QazAqparat tilshisi.
«Qazaqstan – demokratııalyq, zaıyrly, quqyqtyq jáne áleýmettik memleket. Konstıtýtsııaǵa sáıkes bizde ar-ojdan bostandyǵy bar. Iman – júrekte. Іzgilik – tilekte. Azamat qaı dindi ustanady? Onyń senim–nanymy qandaı? Árkimniń óz erki. Buǵan Ata zańda kepildik berilgen. Biraq solaı eken dep ózimiz ómir súrip otyrǵan qoǵamdy ala taıdaı búldirýge, óz dinı ustanymyn ózgege tańýǵa, top quryp, jik-jikke bólinýge jol berýge bolmaıdy. «Dombyra – haram, sálem salý – haram, eldiń bári hıdjap pen nıqab kııýi kerek» degen talaptar Konstıtýtsııamyzǵa qaıshy keledi. HHІ ǵasyr – jahandaný zamany. Órkenıet kóshin bastap kele jatqan memleketter qaıda? Biz qaıdamyz? Ozyq jurt qazir jasandy ıntelektpen, tehnologııalyq jetistiktermen aınalysyp jatqanda, biz elimizdi orta ǵasyrdaǵy deńgeıge súıremekpiz be?», - dedi N. Júsip Úkimet basshysy Álıhan Smaıylovtyń atyna joldaǵan saýalynda.
Onyń paıymynsha, ulttyq qundylyqtar – qazirgideı jahandaný kezeńinde jastardy túrli gıbrıd, sýbmádenıetterdiń yqpalyna túsip ketýden qorǵaıtyn birden bir ımmýnıtet.
«Bizdiń ata saltymyz bar. Halyqtyq qalpymyz bar. Qansha dáýirden beri qalyptasqan Ulttyq qundylyqtarymyz bar. Solardyń bárin tárk etemiz be? Ata dinimizdi ardaqtaýdyń, salt-dástúrimizdi saqtaýdyń ornyna búkil qoǵam bolyp ózge aǵymdardyń jeteginde ketemiz be? Másele dabyl qaǵarlyq deńgeıge jetti. Elimizde dinge qyzyǵýshylardyń ortasha jas mólsheri jasaryp keledi. Beıresmı derekterge sáıkes dinı bilim izdenýshilerdiń 75 paıyzy ashyq ınternet resýrstardy paıdalanady. Óz kezeginde destrýktıvti kúshter aqparattyq keńistiktiń barlyq múmkindikterin óz qyzmetinde ońtaıly paıdalanyp otyr. Sonyń saldarynan óz azamattarymyzdan salt-dástúrimiz ben ulttyq qundylyqtarymyzǵa, dástúrli mádenıet pen ónerge qarsylyq bildirý, memlekettik rámizder men keıbir merekelerdi qurmettemeý, zańmen belgilengen áskerde qyzmet etý, orta bilim alý syndy ortaq mindetterden, medıtsınalyq rásimderdiń keıbir túrlerinen bas tartýy sııaqty zaıyrly qoǵam talaptaryna saı kelmeıtin qarsylyqtar anyq baıqalýda. Sondaı-aq jastardyń nazaryn jalpyǵa ortaq oqý-bilimnen, parasatty paıymnan, zamanaýı qundylyqtardan burmalanǵan taıaz dinı túsinikterge buryp áketý áreketteri ashyq jalǵasyp jatyr», - dedi senator.
Onyń aıtýynsha, qazir osyndaı syrt kúshterden azmattardy arashalap alýǵa kómektesetin saýatty teologtar men ımamdar da tapshy.
«Birinshiden, shetelderdiń ozyq tájirıbesin zerdeleı otyryp, qoldanystaǵy zańnamany ulttyq dúnıetanymdy eskere otyryp jetildirýdi usynamyz. Ekinshiden, ulttyq qundylyqtardy memlekettik deńgeıde nasıhattaý, BAQ-ta, mektep jáne otbasynda, qoǵamdyq ınstıtýttarda keńinen tanym-túsinik jumystaryn júrgizý kerek. Úshinshiden, din isteri basqarmalaryn barlyq óńirlerde bólek basqarma retinde qaıta ashý jáne olardyń kadrlyq áleýetin kúsheıtýdi suraımyz», - dedi depýtat.
