Jastar jyly jastardy jumyspen qamtýǵa jaǵdaı jasaýymyz qajet - Jas Otan
Uıymnyń atqarýshy hatshysy Dáýlet Káribektiń aıtýynsha, qazirdiń ózinde jastar máselesine erekshe kóńil bólinip keledi. Al Jastar jyly sııaqty bastamanyń arqasynda osy saladaǵy jumysty kúsheıtýge bolady.
«Negizi, osy ýaqytqa deıin jastar máselesine kóp kóńil bólindi. Máselen, ótken jyly Memleket basshysy bes áleýmettik bastamasyn jarııalaǵan bolatyn. Sonyń ózi jastar úshin jasalyp otyr. Óıtkeni 14-29 jas aralyǵyndaǵy jastardyń barlyǵy grantqa túsemin dep oılaıdy Sol úshin granttardyń sany kóbeıip jatyr. Al oqýǵa túsken stýdentterdiń kóbisi jataqhanada turǵysy keledi. Qazir jataqhanalardyń qurylysy bastalýda. Odan keıin ýnıversıtet bitirgen jastardyń bári jumysqa turady. Olardyń eńbek ótili az bolǵandyqtan, jalaqysy da tómen bolady. Prezıdent jalaqysy tómen azamattardyń salyǵyn 10 esege tómendetýdi tapsyrdy. Shaǵyn jáne orta bıznesti ashý úshin qarjylandyrý kólemi artty. Onda da jastar kóp. Bunyń barlyǵy jastarǵa qatysty», - dedi D.Káribek QazAqparat tilshisine bergen suhbatyna.
Onyń sózine qaraǵanda, Jastar jyly Qazaqstan jastaryna úlken ári tarıhı múmkindikti berip otyr. Birinshiden, jastardyń rýhanı jaǵynan baıýyna basa nazar aýdarý qajet. Ekinshiden, bilim máselesin eskerý kerek.
«Bilim bolǵanda jastardyń alǵan bilimi eskirmeı turǵanda onyń tıimdi paıdalanýyna jaǵdaı jasaýymyz qajet. Sosyn ózin-ózi damytý máselesine kóp kóńil bólgenimiz jón. Úshinshiden, bilim alǵan jastardyń barlyǵyn jumyspen qamtýǵa jaǵdaı jasaýymyz qajet. Tórtinshiden, jastar arasyndaǵy otanshyldyqty kúsheıtý. Bul degenimiz, basty baılyǵymyz - Táýelsizdik ekenin keńinen túsindirip, tabıǵatqa qurmetpen qaraýǵa úıretýimiz kerek. Osy oraıda eriktiler qozǵalysyn jańa baǵytta damytqan jón, ıaǵnı, jastardyń kásibı damýy úshin eriktilikti áleýmettik lıft retinde qoldanýymyz qajet.
Budan bólek, jastardyń bos ýaqytyn paıdaly uıymdastyrý jaǵyn oılanýymyz kerek. Ol úshin oıyn-saýyq ortalyqtary men qor-qor shegetin oryndardy kóbeıtpeı, kitaphanalar, shyǵarmashylyq úıirmeler, aýla klýbtary sııaqty jobalardy kóptep iske asyrýymyz abzal. Biz úshin Jastar jyly san alýan aktsııalar men fleshmobtardy jyly bolmaýy kerek», - dep atap kórsetti D. Káribek.
Hatshynyń oıynsha, jastar arasyndaǵy quqyqtyq mádenıetti, qoǵamdyq tártipti kúsheıtip, quqyq buzýshylyq pen sybaılas jemqorlyqqa múldem tózbeýshiliktiń qalyptastyrý sharalaryna basymdyq bergen jón. Osynyń nátıjesinde memlekettik baǵdarlamalardyń tıimdiligi artady.
«Biz bunyń barlyǵyn bir jyldyń ishinde jasamasaq ta, 2019 jyl - Jastar jylyn, bizge berilip otyrǵan tarıhı múmkindikti paıdalanyp, bıyl negizgi fýndamentin jasaýymyz qajet. Sebebi 2050 jyly Qazaqstandy quratyn da, damytatyn da - jastar», - deıdi D.Káribek.
