Jastar jyly: «Jańǵyrý joly» qozǵalysy arnaıy jol kartasyn iske asyrady

ASTANA. QazAqparat - 2019 jyly ótetin «Jastar jylynda» Qazaqstan halqy Assambleıasynyń «Jańǵyrý joly» respýblıkalyq jastar qozǵalysy arnaıy jol kartasy boıynsha jumys júrgizbek, dep habarlaıdy QazAqparat tilshisi.

«Keler jyly «Jańǵyrý joly» respýblıkalyq jastar qozǵalysynyń jol kartasy júzege asyrylady. Bul degenińiz - 19 ózindik joba. Olardyń bári de áleýmettik lıftilerdiń aýqymdy alańyn qurýǵa jáne barlyq sanattaǵy jastarymyzdy qoldaýǵa baǵyttalǵan», - dedi búgingi QHA Keńesiniń keńeıtilgen otyrysynda QHA tóraǵasynyń orynbasary - hatshylyq meńgerýshisi Leonıd Prokopenko.
 

Onyń aıtýynsha, búgingi tańda Assambleıanyń barlyq qoǵamdyq qurylymdarynda jastardyń basqarýshylyq korpýstary qurylǵan.

«Onyń quramyna qazirgi tańda 250 adam kiredi. Ol «Jańǵyrý joly» respýblıkalyq jastar qozǵalysymen birge «Jastar jylyn» laıyqty ótkizýge jáne sharalardy uıymdastyrýǵa atsalysatyn bolady», - dedi Leonıd Prokopenko.
 

Eske sala ketsek, QR Prezıdenti Nursultan Nazarbaev Qazaqstan halqyna bıylǵy Joldaýynda 2019 jyldy Jastar jyly dep jarııalaýdy usynǵan bolatyn. Prezıdent óz sózinde jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin aıtqan bolatyn.

Al, arada bir aıdan astam ýaqyt ótkende Elbasy Jarlyǵymen 2019 jyl Jastar jyly dep jarııalandy.