Jastar jyly: Ulttyń bolashaǵy bilimdi, jigerli jastardyń qolynda - magıstrant

ORAL. QazAqparat - Ulttyń bolashaǵy bilimdi, jigerli jastardyń qolynda. M.Ótemisov atyndaǵy Batys Qazaqstan memlekettik ýnıversıteti jastar isi jónindegi komıtetiniń ádiskeri, bıologııa mamandyǵynyń 1-kýrs magıstranty Abylaı Qonysbaev osylaı dedi, dep habarlaıdy QazAqparat tilshisi.

Onyń aıtýynsha, kez kelgen qoǵamda eldiń órkenıet kóshine ilesip ne artta qalǵanyn jastarynyń belsendiliginen baıqaýǵa bolady.

Jastar tárbıesimen jumysty jaqsartý, egemen elimizdiń salaýatty urpaqtaryn qalyptastyrý - Elbasynyń ár Joldaýynda atap kórsetiletin basty mindetterdiń biri.

-Memleket basshysynyń 2019 jyldy Jastar jyly dep jarııalaýynyń ózi árqashan jastardy qoldap, olardyń árbir is-áreketine kóńil bólip, jasalynyp jatqan jumystarǵa oń baǵasyn berip otyrǵanynyń naqty dáleli dep bilemin. Sondyqtan da egemendi eldiń belsendi jastary bul jylda el bolashaǵyna aıtarlyqtaı septigin tıgizetin tyń jobalarmen jáne jaqsy kórsetkishtermen Elbasy artqan senimdi abyroımen atqara alady. Osy oraıda 23 qańtar kúni ótken «Táýelsizdik urpaqtary» atty forýmda Prezıdent saltanatty túrde ashyp bergen Jastar jyly biz úshin úlken múmkindik dep esepteımin. M.Ótemisov atyndaǵy Batys Qazaqstan memlekettik ýnıversıtetiniń stýdent-jastary (barlyǵy 4 myńnan astam adam) Jastar jylynyń saltanatty ashylýyn tikeleı efırden tamashalap, erekshe áser aldy. Elbasy jıyn barysynda atap ótken baǵyttardaǵy jobalardy júzege asyrýǵa batysqazaqstandyq jastardyń da óz úlesterin qosatynyna senimdimin. Jaqsy nátıjelerge toly tabysty jyl bolsyn! - dedi «QazAqparat» tilshisine A.Qonysbaev.

Eske sala keteıik, budan buryn batysqazaqstandyq stýdenttiń bolashaqta aýyl sharýashylyǵy salasyn damytqysy keletinin jazǵan bolatynbyz.