Jastar jyly: Tarazda «Basta» bıznes-forýmy ótti
Atalmysh forýmǵa «Jas kásipker» jobasynyń alǵashqy túlekteri qatysyp, óz bıznesin ashýdy armandaıtyn jastarǵa aqyl-keńesterin aıtty. Olar aǵymdaǵy jyly bastalǵan «jas kásipker» jobasy boıynsha múmkindikter mol ekenin jetkizdi.
«Búgingi kúni »Jas kásipker« jobasy boıynsha tyńdaýshylardyń ekinshi legin oqytý aıaqtaldy. Barlyǵy 1000 adamdy qamtý josparlanýda. Oblys boıynsha 10 oqý synyby jumys isteıdi. Oqýdy aıaqtaǵannan keıin jastar óz bıznesiniń basynda granttar nemese jeńildikti nesıeler ala alady. Búgingi forýmdy biz »Jas kásipker« jobasynyń túlekterin tek óńirdiń ǵana emes, elimizdiń de jumys istep turǵan kásipkerlerimen kezdesý maqsatynda uıymdastyrdyq»,- deıdi oblystyq Kásipkerler palatasynyń mamandary.
«BASTA» forýmy alańynda erkin formatta qatysýshylar jumys istep turǵan kásipkerlerdiń tarıhyn tyńdap, spıkerlerge tikeleı ózderin qyzyqtyratyn suraqtaryn joldady. Spıkerler qatarynda kásibı jaýynger, Alem fighters sport klýby jelisiniń ıesi, «Ardaq Nazarov» qorynyń qurýshysy Ardaq Nazarov, «Astana park» kınoteatrynyń negizin qalaýshy Oljas Qýandyqov, «Etky»kompanııasynyń ıesi Jandos Ahmetov bar. Olar óz bıznesin qalaı bastaǵany, qandaı qatelikter jiberilgeni jáne olardy qalaı túzetilgeni týraly aıtty.
«Bızneste tabandylyq, shydamdylyq qajet. Árdaıym táýekel etip, kez-kelgen kedergige daıyn bolý kerek. Qatelikter men kedergilerdi synaq retinde qabyldap, sheginýge jol bermeý tyrysqan abzal. Óıtkeni, barlyq synaqtardan ótip, tabysqa jetken soń, siz Jeńistiń shynaıy dámin sezinesiz. Men »Jas kásipker«sııaqty aýqymdy jobanyń bir bóligi bolyp tabylǵanyma óte qýanyshtymyn. Bul joba jastardyń tabysty bolashaǵynyń kepili. »Jas kásipker« jobasy kóptegen bolashaq kásipkerler úshin tabysqa jetýdiń bastamasy bolady dep senemin», - dep atap ótti Ardaq Nazarov.
Spıkerlerge suraqtar joldaǵandardyń deni kásipti kapıtalsyz qalaı bastaý bolatynyn, qandaı salada kásipkerlikpen aınalysqannyń durystyǵyn jáne jas bıznesmenderge memleket qandaı qoldaý kórsetýde ekendigin surap, naqty jaýaptar aldy.
