Jastar jyly sportshylarǵa serpin beredi - Azııa chempıony
«Prezıdentimizdiń bıylǵy jyldy Jastar jyly dep bekitýi - jastarǵa zor serpin beredi dep oılaımyn. Ásirese, sporttaǵy, óner men ǵylymdaǵy jastarǵa bul jyl jańa múmkindikterge toly bolar degen senimdemin. Jalpy, qazirgi ýaqytta Qazaq kúresinde de jastardyń bilekti shoǵyry qalyptasyp qalǵanyn bilesizder. Prezıdentimizdiń qoldaýymen ózge sport túrlerimen birge, Qazaq kúresiniń de aýqymy keńeıe túser degen oıdamyn», - deıdi Aıbat Seıten.
Balýannyń aıtýyna qaraǵanda, bapkerlerdiń balýandardy daıyndaýdaǵy deńgeıine baılanysty ár oblysta Qazaq kúresi damyp keledi.
«Eger bapkerler balýandardy durys daıyndasa, qazirgi ýaqytta elimizdegi kez kelgen iri týrnırlerge jol ashyq. Talpynysy bolsa talantty eshkim toqtata almaıdy. Oblystardan myqty balýandar shyǵyp jatyr. Onyń bári eń aldymen bilikti bapkerlerdiń arqasy», - deıdi ol.
Aıbat Seıten sonymen birge Qazaq kúresiniń sońǵy jyldardaǵy qarqyn alýyna qatysty oıyn aıtyp ótti.
«Sońǵy 10 jyl burynǵy deńgeıi men qazirgi ýaqyttaǵy deńgeıdi salystyratyn bolsańyz, qazir Qazaq kúresiniń joǵary satyǵa kóterilgenin ańǵarýǵa bolady. Osy qarqyndy saqtaı bilsek, Qazaq kúresiniń deńgeıi tipten bıikteı túseri aıqyn. Onyń bir sebebi - Arman Shoraev aǵamyzdyń «Qazaqstan barysy» syndy jobany jasap, halyqqa Qazaq kúresin tanytýy, odan da bólek aǵalarymyzdyń ulttyq sporttyń damýyna úles qosýy dep aıtar edim. Qazir «Qazaqstan barysy» dese halyqtyń bári de biledi. Balýandardy da ártúrli jerde tanyp jatady», - deıdi Aıbat Seıten.
Eske sala ketsek, Prezıdenttiń qatysýymen Qazaqstanda Jastar jyly resmı túrde bastalǵan bolatyn. Memleket basshysy Astanada uıymdastyrylǵan «Táýelsizdik urpaqtary» atty saltanatty sharada jas mamandar men otbasylardy qoldaýǵa qatysty birqatar tapsyrmalardy júktegen edi.
