Jastar jyly: Soltústikqazaqstandyq stýdent oı-óristi damytatyn oıynshyq shyǵarmaq

PETROPAVL. QazAqparat - M.Qozybaev atyndaǵy Soltústik Qazaqstan memlekettik ýnıversıtetiniń birinshi kýrs stýdenti Janat Kákimov kóp uzamaı jeke isin ashpaqshy. Jas kásipkerdiń bıznes jospary daıyn tur, dep habarlaıdy QazAqparat tilshisi.

Elbasynyń «Jastar jylynyń» ashylý saltanatynda sóılegen sózinen shabyttanǵan Janat Kákimov Petropavldaǵy 27-mekteptiń 11-synybynda oqyp júrgen kezinde-aq oblystyq kásipkerler palatasynda «Jas kásipkerler» mektebiniń ashylǵanyn estip, oılanbastan kýrstarǵa jazylǵan. Nátıjesinde bozbalanyń oıyna ushqyr bıznes-ıdeıa kelip, kóp uzamaı bıznes-jospar da daıyn bolady.

«Kásipker bolýdy bala kezimnen armandadym. Óse kele ne dáriger, ne kásipker bolamyn degen toqtamǵa keldim. Sol ýaqytta ashylǵan «Jas kásipkerler» mektebi meniń tańdaýymdy aıqyndap berdi. Onyń ózinde kásipkerlik jolyn tańdasam, alyp-satarlyqqa emes, naqty óndiriske baramyn dep sheshtim», - deıdi Janat Kákimov.

Elbasynyń jazý reformasyn qoldaǵan soltústikqazaqstandyq jas, osy aýqymdy mindetti tıimdi júzege asyrý amaldaryn izdestiredi. Sóıtip, qaladaǵy dúken-sýpermarketterdi aralaı kele, erteń mektep tabaldyryǵyn attaıtyn jetkinshekter úshin latynsha birde-bir oıyn quralynyń joqtyǵyn baıqaıdy. Osylaısha, latynsha qaripterdi tanyp-bilýdi jeńildetý úshin balalarǵa olardy gıps qalypshalar arqyly óz qoldarymen jasatqan jón bolady dep oı túıedi.

«Ýnıverstıtette jobamdy birge júzege asyratyn jalyndy jastardy taptym. Almaz Akıshev dızaınmen aınalysyp, qalyptardaǵy kompozıtsııany, jınaq qorabyn daıyndady. Aqparattyń tehnologııalar mamandyǵyn meńgerip júrgen Erlan Japarov qalyptardyń 3d úlgilerin jasady. Osy úlgiler boıynsha aǵash matrıtsalar kásipker Aleksandr Eşanovtyń qoldaýymen «Art Sıtı» JShS tsehynda jasalyp, olardyń negizinde polımerden gıpske arnalǵan qalypshalar quıyldy», - deıdi jas kásipker.

Endi oıyn júzege asyryp, óndiristi jolǵa qoıý úshin Janat Kákimov «Bastaý» baǵdarlamasyna júginetin bolady.

«Elbasynyń jastarǵa osyndaı múmkindik berip jatqanyna rızamyn. Nursultan Nazarbaev kúni keshe aldaǵy 2 jylǵa «Jas kásipker» baǵdarlamasyn iske asyrý úshin 32 mlrd teńge bólinetinin jetkizdi. 3 jylda «Atameken» UKP osylaısha 300 myń jasty oqytyp shyǵarady. Men kezinde «Bastaý» jaıly estimegende, bıznesti qalaı ashyp, ne isteý kerektigin bilmes edim», - deıdi stýdent.

Aıtý kerek, latyn áripteri qalybynan bólek, Janat Kákimov gıps oıynshyqtardyń kómegimen balalarǵa qazaqtyń aýyz-ádebıetiniń keıipkerlerin, týǵan ólkeniń, elimizdiń qasıetti jerlerin tanystyrýdy oılap otyr.