Jastar jyly sheńberinde Aqmola oblysynda 2 myńnan astam shara ótkizildi
Oblystyq ishki saıasat basqarmasy basshysy Altynaı Ámirenovanyń tóraıymdylyǵymen ótken sharaǵa oblys aýdandarynyń jáne Stepnogorsk, Kókshetaý qalalary ákimderiniń orynbasarlary, ishki saıasat bólimderiniń basshylary qatysty. Basqarma basshysy óz baıandamasynda oblystaǵy buqaralyq aqparat quraldarynyń jumysy, ondaǵy jarııalanǵan materıaldardyń shyǵýy, elektrondy BAQ-tardaǵy maqalalardyń sapasy men úkimettik emes uıymdardyń jumysy jaıynda aıtyp berdi.
Sondaı-aq, «Rýhanı jańǵyrý» baǵdarlamasy men jalpyulttyq jobalardyń júzege asyrylýy, til, din, jastar, aqparattyq saıasat salasynda atqarylatyn bıylǵy jyldyń mindetteri belgilendi.
«Memleket basshysynyń Joldaýynda aıtylǵan mindetterdi júzege asyrýdyń naqtyly nátıjelerin aqparattyq súıemeldeý qajet», – dep atap ótti Altynaı Ámirenova.
Basqarma basshysy ishki saıasat salasynda 2019 jyly atqarylǵan jumystardyń qorytyndysyn shyǵaryp, 2020 jylǵy josparlarmen bólisti. Naqtyraq aıtsaq, Jastar jyly oblysta barlyǵy 2 myńnan astam shara ótkizildi.
Al bıylǵy jyly Abaıdyń 175 jyldyǵy, Ál Farabıdiń 1150 jyldyǵy, Altyn Ordanyń 750 jyldyǵy, Jeńistiń 75 jyldyǵy, Qazaqstan Respýblıkasy Konstıtýtsııasynyń 25 jyldyǵy jáne Qazaqstan halqy assambleıasynyń 25 jyldyǵy atalyp ótiledi.
Sonymen qatar, Kókshetaý qalasynda Qazaqstan men Reseı yntymaqtastyǵynyń aımaqaralyq 17-shi forýmy ótkiziledi.
Shara sońynda áleýmettik jelide jumys isteý boıynsha semınar-trenıng uıymdastyrylyp, jyl boıy belsendi jumys istegen birqatar qyzmetkerler marapattaldy.
