Jastar jyly: Pavlodarda 500-ge jýyq aýqymdy shara ótpek

PAVLODAR. QazAqparat - Pavlodar oblysynda bıyl Jastar jly aıasynda 500-ge jýyq aýqymdy shara ótpek, dep habarlaıdy QazAqparat.

«Óńirde bir jyldyń ishinde túrli baǵyttaǵy 500-ge jýyq aýqymdy shara ótkizbekshimiz. Sonyń ishinde ekologııalyq baǵytta da atqarylatyn ister bar. Búgingi balyqtardy qutqarý sharasy jastar jylyndaǵy alǵashqy ıgi isterimizdiń biri» -deıdi oblystyq jastardy damytý ortalyǵy dırektorynyń orynbasary Asqar Tynybaev.

Aıta ketsek, búgingi balyqtardy qutqarý naýqanyna óńirimizdiń jas belsendileri de jumyla qoldaý kórsetip jatyr. Óıtkeni qysta muz qatqannan keıin aıdyndardaǵy balyqtarǵa aýa jetpeı, qyrylyp qalý qaýpi tónedi.

«Qysta, ásirese kóktemge qaraı sý jándikteri aýa jetpeı qalý qaýpi týyndaıdy. Sondyqtan muzdy oıyp ol jerge qamys shanshyp qoısa, ottegi tútikshe arqyly jetedi. Oblystaǵy barlyq toǵandarda osyndaı shara uıymdastyryp jatyrmyz», - dedi Pavlodar oblystyq orman sharýashylyǵy jáne janýarlar álemi aýmaqtyq ınspektsııasynyń basshysy Serik Ábsalyqov.

Orazaı Shamuǵanuly