Jastar jyly: Elbasy jas ǵalymdarǵa bólinetin granttardy 3 mlrd teńgege arttyrýdy tapsyrdy
«Qazirgi tańda ónerli jastardy qoldaý úshin belsendi túrde jumys júrgizilip jatqanyn bilesizder. Qoǵamda túrli baǵyttar kreatıvti azamattardyń tutas shoǵyry qalyptasty. Sonymen birge, jas ǵalymdarǵa kómek kórsetýdiń mańyzy zor. Biz «Bolashaq» baǵdarlamasyn bekitkenimizdiń durys bolǵanyn ómirdiń ózi kórsetip otyr. Bizdiń elimiz úshin eń kúrdeli bolǵan 1993 jyly qarttarǵa zeınetaqysy bere almaı jatqan kezde, muǵalimder men dárigerlerge, áskerılerge aılyǵyn tóleı almaı jatqan tusta jastarymyzdy álemniń eń úzdik JOO-laryna joldap jattyq. Memleket árbir jas úshin jyl saıyn 30 myńnan 50 myń AQSh dollaryna deıin tólep otyrdy. Mine, osy jolmen qazirgi tańda 14 myń jas óren oqyp, taǵy da 20 myńyn ata-analardyń ózi jiberip otyr. Olardyń 12 myńy qaıtyp kelip, bizdiń ekonomıkaǵa jumys isteýde», - dedi Memleket basshysy Astanada ótip jatqan «Táýelsizdiktiń urpaqtary» atty Jastar jylynyń ashylý saltanatynda.
Elbasy óz sózinde Nazarbaev ýnıversıtetin tilge tıek ete kele ol oqý ornynyń túlekteri bilimin jetildirý úshin álemniń eń úzdik JOO-larynda oqýyn jalǵastyryp jatqanyn aıtyp ótti.
«12 myń «Bolashaq» túlegi, Nazarbaev ýnıversıtetiniń túlekteri, KıMEP - bári de qazirdiń ózinde bizdiń eldiń keleshektegi elıtasyn quryp jatyr. Jas ǵalymdarǵa óz ıdeıasyn shynaıy jobalarǵa aınaldyrýda kómektesý kerek. Ózim týra osy máselemen aınalysýdy kózdep otyrmyn. Úkimetke osy jumysty arnaıy baqylaýǵa keńes beremin. Bul protseske Nazarbaev ýnıversıteti de kirisedi. Osy maqsatta Úkimetke jas ǵalymdardyń fýndamentaldy jáne qoldanbaly zertteýine bólinetin granttyq qarjylandyrýdy jyl saıyn 3 mlrd teńgege arttyrýdy tapsyramyn», - dedi Memleket basshysy.
Aıta ketsek, Jastar jylynyń ashylýyna Úkimet músheleri, QR Parlamenti depýtattary, jergilikti atqarýshy organ basshylary, QR Prezıdenti janyndaǵy Jastar saıasaty keńesiniń músheleri, «100 jańa esim» baıqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jıynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýı medıa salasynyń ókilderi, balalar úıiniń tárbıelenýshileri men túlekteri, jas áskerı qyzmetshiler kelgen.
Eske sala ketsek, QR Prezıdenti Nursultan Nazarbaev Qazaqstan halqyna ótken jylǵy Joldaýynda 2019 jyldy Jastar jyly dep jarııalaýdy usynǵan bolatyn.
Prezıdent óz sózinde jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin aıtqan bolatyn Al, arada bir aıdan astam ýaqyt ótkende Elbasy Jarlyǵymen 2019 jyl Jastar jyly dep jarııalandy.
