Jastar jyly aıasynda elordada 600-den astam shara ótti
NUR-SULTAN. QazAqparat – Bıyl Nur-Sultanda jastar jyly aıasynda 600-den astam túrli baǵyttaǵy is-shara ótti, dep habarlaıdy QazAqparat tilshisi.
«Qalalyq ákimdik «Jastar jyly» aıasynda jastardyń bastamalaryn qoldaýǵa, shyǵarmashylyǵyn shyńdaýǵa arnalǵan baǵyttaǵy kóptegen jumystardy atqardy. Jastar jyly aıasynda qalalyq ákimdik arnaıy jol kartasyn bekitti. Ol óz kezeginde 11 baǵyt pen 136 jobadan turady. Sol jobalardyń aıasynda elordada 600-den astam is-shara ótkizildi. Ol sharalar boıynsha birer mysal keltirer bolsaq, bıyl 1050 astanalyq jasqa satyp alý quqyǵynsyz jaldap turýǵa páter beriledi. Odan bólek, elordalyq jas kásipkerlerdi qoldaý maqsatynda ákimdikten 75 mln teńgeniń memlekettik granty berildi», - dedi qalalyq ákimdiktiń jastarmen jumys bóliminiń basshysy Baqytjan Júnisbekov.
Onyń aıtýynsha, bıyl 220-dan astam jas óz kásibin dóńgeletýge múmkindik aldy.
«Jastardy mazalaıtyn suraqtardyń biri — jumysqa ornalasý. Nur-Sultan qalasynda jumyssyzdyq deńgeıi 4-5 paıyz. Ústimizdegi elordadaǵy joǵarǵy jáne arnaýly orta bilim berý oshaqtaryn bitirgen 5,5 myń jas maman jumysqa ornalastyryldy. Óz kezeginde elorda ákimdigi el ıgiligi men qoǵamnyń damýyna óz úlesin qosýǵa daıyn jastardy árqashan qoldaý kórsetýge daıyn», - dedi ol.
Ákimdiktiń deregine súıensek, bas qaladaǵy jastardyń sany 245 myńnan asady.
Buǵan deıin habarlaǵanymyzdaı, búgin Nur-Sultanda «Elorda jastary syılyǵy-2019» baıqaýy ótti.
