Jastar jyly: Aýylda at sportyn damytý qajet - jas maman
Onyń aıtýynsha, jýyrda Astanada Elbasynyń qatysýymen ótken Jastar jylynyń ashylý saltanatynda jetkinshek urpaqty sport pen týrızmge keńinen tartyp, respýblıkalyq chempıonattar ótkizý máseleleri sóz boldy.
«Men ınformatıka mamandyǵyn meńgerip, «Dıplommen aýylǵa» baǵdarlamasy boıynsha aýylǵa kelip, ustazdyq qyzmet atqaryp kelemin. Shákirtterimdi bilim men ónerdiń túr-túrine baýlımyn. Ózim de sporttyń boks (1 razrıad), kúres, basketbol, toǵyzqumalaq, ústel tennısi túrlerimen aınalysamyn. Qazirgi kezde aýdandyq mektepten tys jumystar ortalyǵynyń basshysy retinde balalardyń shyǵarmashylyq eńbekpen shuǵyldanýyna, osy bastan salaýatty ómir súrýge daǵdylanyp, bos ýaqyttaryn maǵynaly ótkizýine basa nazar aýdaramyn. Árıne, sport ta umyt qalmaq emes. Osy oraıda balalar jastaıynan atqa minip, jylqyǵa jaqyn ósse, ózderi úshin paıdaly dep oılaımyn. Basqasyn aıtpaǵanda, atpen serýendeýdiń ózi em. Sonymen qatar aýyldarda at sporty túrlerin damytýdy qolǵa alsa, dúbirli dodalarda top jaratyn talanttar shyǵar edi», - deıdi jas maman.
Atqa miný mádenıetiniń erteden bastalǵany jóninde Elbasynyń «Uly dalanyń jeti qyry» atty baǵdarlamalyq maqalasynda aıtylǵany málim.
«Jylqy maly qazaq halqynyń ómirimen bir jasasyp kele jatqan janýar desek, qatelespeımiz. Atqa miný, ony baptaý týraly maqalada jaqsy tujyrym jasalǵan. Aqyn Qadyr Myrza Álıdiń: «Atqa degen qumarlyǵy halqymnyń, mashınaǵa kóshse kerek búginde» degen óleń joldarynda aıtylǵandaı, búginde atqa qumarlyqty, baptaýdy álsiretip alǵanymyz anyq. Muhtar Áýezov: «Báıge attyń músinin synap, sıpattaýda Abaı úlken bilimdilik, baıqaǵyshtyq tanytady. Ol ári sheber aqyn bolýdyń ústine asa bilgir, saıatshy, atseıis synshy», - degenindeı, Abaı - júırik attyń túr sıpatyn jazyp ketken birden-bir ǵulama. Abaıdyń «Attyń syny» óleńinde júırik attyń qalaı bolatyny sıpattalǵan. «Atyń jaqsy bolsa, tiri dúnıeniń shýaǵy, balań jaqsy bolsa, eki kózińniń shyraǵy», degendeı, ár qazaq atqa minýdi, qoldanýdy, qyr-syryn bilýi tıis dep bilemin.
«Janyna elimizdiń jylqy jaqqan,
Jylqyǵa jetpegen kóz jaýtań qaqqan.
Mińseń - at, ishseń - qymyz, jeseń - qazy,
Qashannan qazaq halqy jylqy baqqan», - dep, Іlııas Jansúgirov jyrlaǵandaı, uly dala jylqysynyń dańqy jarqyraıtyn kezeń týdy dep esepteımin. Atqa mingen qazaqtyń rýhy myqty bolady.
Endeshe, ulttyq rýhymyzǵa saı bolyp, Jastar jylynda ǵana emes, odan keıin de aıanbaı eńbek etip, aldyńǵy shepten tabylyp, elimizdiń damýyna jastyq jalynmen úles qosý - bizdiń de basty mindetimiz dep bilemin», - dep túıindedi sózin N.Mızambaev.
