Jastar jyly: Astananyń Baıqońyr aýdanynda 10 baǵytta jumys atqarylady
«Memleket basshysy N.Á. Nazarbaev jastarǵa mańyzdy tórt baǵytty atap ótti: qoljetimdi jáne sapaly bilim, jumyspen qamtý, turǵyn úı jáne otbasyn qurý máseleleri. Sondaı aq, jumysker jastarǵa páter salýdy jáne erikti stýdentterdiń shákirtaqysyn 30% kóterý, shaǵyn jáne orta kásipkerlikti odan ári damytý jáne aýyl sharýashylyq salasyn damytyp, «Dıplommen aýylǵa» baǵdarlamasyn qaıta jańǵyrtý jóninde tapsyrmalar berdi», - dep atap ótti Muhamedjan Bolysbek.
Osyǵan oraı, fılıal ókili «Jastar jyly - 2019» aıasynda oryndalatyn 10 baǵytty atap ótti.
«Jastar jyly aıasynda Astananyń Baıqońyr aýdanynda jastar ortalyǵy ashylady. Ekinshiden, Baıqońyr aýdanyna qarasty ár salanyń jastary bas qosatyn kovorkıngke oryn beriledi. Úshinshiden, Elbasynyń shaǵyn jáne orta bıznes úlesin arttyrý týraly tapsyrmasyna sáıkes, «Damý» kásipkerlerdi qoldaý qorymen birlesip, «Jas kásipkerlerdi qoldaý» ortalyǵyn quramyz», - dedi ol.
XXI ǵasyr - tehnologııa ǵasyry bolǵandyqtan, Baıqońyr aýdanyna qarasty kolledjderde jastarǵa tegin IT-ortalyq ashylady.
Besinshiden, «Jastar jyly - 2019: Jalyn. Jasampazdyq. Jańǵyrý» atty erkin formatta jastar lageri uıymdastyrylady.
«Stýdent jastardyń arasynda startap konkýrstar uıymdastyrý jáne olarǵa qoldaý kórsetý de nazarǵa alyndy. Múmkindigi shekteýli jastardy qoldaý boıynsha da birqatar jobalar jasalady. Sonymen birge, jastar arasynda shyǵarmashylyqty damytý maqsatynda sporttyq, ıntellektýaldyq bastamalar uıymdastyrylady. Toǵyzynshy - jastardyń rýhanı jańǵyrýy aıasynda arnaıy aýdıtorııalarda (mektepter, balalar úıi, áskerı mekemelerde) dárister, suhbattar, kezdesýler ótkizemiz. Sondaı aq, áleýmettik az qamtylǵan jastarmen jumys isteý de josparlanyp otyr», - dedi Muhamedjan Bolysbek.
Eske sala ketsek, QR Prezıdenti Nursultan Nazarbaev Qazaqstan halqyna bıylǵy Joldaýynda 2019 jyldy Jastar jyly dep jarııalaýdy usynǵan bolatyn. 23 qańtarda Astanada «Táýelsizdik urpaqtary» ataýymen Jastar jyly saltanatty túrde ashyldy. Jastar jylyna qatysty barlyq aqparatty «QazAqparat» agenttiginiń arnaıy paraqshasynan oqýǵa bolady.
