Jastar jyly: Aqmolada halyqaralyq skaýttar sadaq atyp, kıiz úı tigedi
ASTANA. QazAqparat - Qazaqstandaǵy Jastar jyly aıasynda Qazaqstandaǵy skaýttar «Uly dala murasy» sletin ótkizedi, dep habarlaıdy QazAqparat tilshisi.
Oǵan álemniń 20 elinen 14-25 jas aralyǵyndaǵy 500-ge jýyq adam jınalady.
«Skaýttar sleti tamyz aıynda Aqmola oblysyndaǵy «NOMADS CAMP» kıiz úı lagerinde ótedi. Onda kóshpendiler mádenıetine basymdyq beriledi. ıAǵnı, jastar úshin sadaq atý, búrkit jiberý, atqa miný, kıiz úı qurastyrý sharalary uıymdastyrylady», - dedi «Uly dala skaýttary» qoǵamdyq uıymynyń prezıdenti Ildar Katenov Astanada Uly dala skaýttarynyń VIII konferentsııasynda.
Onyń aıtýynsha, atalǵan jıyn Qazaqstan úshin teńdessiz ımıdjdik joba bolmaq. Bul arqyly elimizdiń týrıstik tanymaldylyǵyn arttyrýǵa bolady. 
Buǵan deıin qazaqstandyq skaýttardyń AQSh-ta ótetin álemdik sletke qatysatyny habarlanǵan edi. Onda 13-17 jas aralyǵyndaǵy 12 qazaqstandyq óz elin, mádenıetin jáne salt-dástúrin tanystyrady jáne álemge áıgili tulǵalarmen kezdesedi.
Skaýtıng - balalarǵa túrli oıyndar men qyzyqty sabaqtar arqyly orta mektepten de mol málimet, zor bilim men daǵdy bere alatyn bilim júıesi. Ony beıresmı bilim berý júıesi dep ataıdy. Skaýttar jazda - tabıǵat aıasynda tirshilik etýdiń qyr-syryn úırense (otqa as pisiredi, qos qurady, shatyrda uıyqtap, otyn jınaıdy, sýda júzedi, túrli komandyq oıyndar oınaıdy, aǵashqa órmeleıdi t.b.), qysta - týrızm boıynsha jarystarǵa, kvesterge qatysyp, túrli aktsııalar ótkizedi. Skaýt bolý úshin jas ereksheligi mańyzdy emes. Qysqasha aıtqanda, bul júıe balalarǵa jeke tulǵa retinde damýdyń jolyn aıqyndap bermek.
Búginde skaýttyq qozǵalysty QR Parlamenti, jergilikti basqarý organdary, QR bilim jáne ǵylym mınıstrligi, QR Tuńǵysh Prezıdentiniń kitaphanasy, mektepter men balalar shyǵarmashylyq úıleri, qoǵamdyq birlestikter, balalardy damytý jekemenshik ortalyqtary men jalpy bastamashyl ata-analar qoldap otyr.
