Jastar uıymdarynyń kóshbasshylary bas qosty

ALMATY. Sáýirdiń 3-i. QazAqparat /Erbol Azanbek/ - Búgin Almatyda Qazaqstan jastar odaǵynyń uıymdastyrýymen «Memlekettik jastar saıasaty: baǵyty men bolashaǵy» taqyrybynda «dóńgelek ústel» ótti, dep habarlaıdy QazAqparat.

Qazaqstan jastar odaǵynyń tóraǵasy Áset Turdyǵulovtyń aıtýynsha, jastar máselesi men jastar saıasaty barlyq ýaqytta ózekti. «Qazirgi ýaqytta da jastar máselesi mánin joǵaltqan joq. Jastar saıasaty ár ýaqytta zaman talabyna saı jetildirip otyrýdy, ózgeristerdi talap etedi. Búgingi otyrys barysynda memlekettik ókiletti organdar men jastar uıymdarynyń kóshbasshylarynyń basyn qosyp, eń ózekti máselelerdi aıqyndap, talqylaýdy maqsat tuttyq», deıdi ol.

Otyrysqa 35-ten astam uıymdardyń jetekshileri, jastar saıasatyna jaýapty memlekettik organdardyń ókilderi qatysyp, jastardyń áleýmettik máseleleri, bilim alý, kedendik odaq, til máselesi syndy ózekti taqyryptardy talqylady.