Jastar úshin Táýelsizdikten asqaq murat, asqan qundylyq bolmaýy tıis - Kósherbaev

NUR-SULTAN. QazAqparat – Jastar úshin Táýelsizdikten asqaq murat, asqan qundylyq bolmaýy tıis. Bul týraly «Biz - el patrıotymyz» halyqaralyq jastar forýmynda QR Memlekettik hatshysy Qyrymbek Kósherbaev aıtty, dep habarlaıdy QazAqparat tilshisi.

«Jastardyń búgingi alqaly jıyny Memlekettik rámizder kúnimen tuspa-tus kelýiniń sımvoldyq máni bar oılaımyn. Memlekettik rámizder egemendiktiń mártebeli nyshany bolsa, jastar eldiktiń, kemel keleshektiń kepili. Sonymen birge búgingi forým bárimiz úshin qasterli de qasıetti mereke – Táýelsizdiktiń 30 jyldyǵy aıasynda ótip otyr. Táýelsizdik biz úshin janymyzdy táý etip kelemiz. Táýelsizdik ata-babamyzdyń ǵasyrlar boıy ańsaǵan armany, bizdiń ulttyq ıdeıamyz. Sondyqtan el erteńi jastar úshin Táýelsizdikten asqaq murat, asqan qundylyq bolmaýy tıis», - dedi Memlekettik hatshy.

Osy rette Qyrymbek Kósherbaev kezinde Tuńǵysh Prezıdent – Elbasy Nursultan Nazarbaev: «Jas qazaqstandyq azamattar degenimiz - bul tek quqyq ǵana emes, birinshi kezekte óz, óziniń otbasy jáne bizdiń otanymyz úshin jaýapkershilik ekenin este ustaý kerek» dep aıtqan sózin eske salyp ótti.

«Búginde halqymyzdyń 20 paıyzyn 14-pen 29 jas aralyǵyndaǵy jastar quraıdy eken. Al balalar men jasóspirimderdi qosa esepteıtin bolsaq, búgingi qazaqstandyqtardyń deni jastar ekenin kóremiz. Osy turǵydan alǵanda biz tarıhy tereń, bolashaǵy jarqyn, boıyn jastyq jalyny sharpyǵan ultpyz deýge tolyq negiz bar. Endeshe, bardy baǵalap, joqty saralap, táýbemizden jańylmaı, táýekelden taıynbaı Táýelsizdik tasyn órge birge súıreıik, qadirli jastar dostar!», - dedi ol.