Jastar ulttyq qundylyqtarymyzdy quldyratpaýy tıis – Memlekettik hatshy

NUR-SULTAN. QazAqparat – Jastar jahandanýdyń zamanaýı ıgilikterin boıyna sińire otyryp, ulttyq qundylyqtarymyzdy quldyratpaýy tıis. Bul týraly «Biz - el patrıotymyz» halyqaralyq jastar forýmynda QR Memlekettik hatshysy Qyrymbek Kósherbaev aıtty, dep habarlaıdy QazAqparat tilshisi.

«Memleket basshysy Qasym-Jomart Toqaev: «21 ǵasyrda Qazaqstandy bıik belesterge sizder sııaqty bilimi ozyq, oıy ushqyr jastar bastaýy kerek» dep jastardyń aldyna aıqyn mindetterdi belgilep berdi. Prezıdent bizdiń elimizde jaýapty memleket, jaýapty qoǵam, jaýapty adam júıesi berik ornaýy kerek degen ustanymyn erekshe atap ótti. Jáne de memleketimiz búginde óz tarapynan ár salada kósh bastap, jetistikke jetip júrgen jastardy elge tanytyp, olarǵa qoldaý kórsetý is-sharalaryn júıeli túrde júrgizip keledi. Joǵary ıntellekt saltanat qurǵan, aqyl-parasat áleýeti aldyńǵy qatarǵa shyqqan jańa dáýirde bul asa mańyzdy jumys», - dedi Qyrymbek Kósherbaev.

Osy rette ol elimizde «Rýhanı jańǵyrý» baǵdarlamasyn Ulttyq jańǵyrý baǵdarlamasyna aınaldyrý boıynsha naqty is-sharalar qabyldanyp jatqandyǵyn eske salyp ótti.

«Bul jańǵyrýlar eń áýeli elimizdiń erteńgi keleshegi jastar úshin asa qajet. Sizder jańa syn-qaterlerge laıyqty jaýap bere otyryp, ulttyq qundylyqtarymyzdy qasterlep, olardy basty murattaryńyzǵa saı ornyqtyrýlaryńyz qajet. Mysalǵa, zertteýler kórsetip otyrǵandaı, búgingi jastar dańǵaza toı-dýman men asyra ysyrapshyldyqty qalamaıdy eken. Bul ne degen úrdis? Óıtkeni, ata dinimizde, ulttyq dástúrimizde hákim Abaı aıtqandaı, artyq maqtanysh, asta-tók ysyrapty ıgi ádepterdiń qataryna eshqashan jatqyzbaǵan. Sondyqtan jastar jahandanýdyń zamanaýı ıgilikterin boıyna sińire otyryp, ulttyq qundylyqtarymyzdy quldyratpaýy tıis», - dedi Qyrymbek Kósherbaev.