Jastar týrızmin damytýymyz kerek - Memleket basshysy
«Byltyr men ózim bastap bergen «Jas sarbaz» qozǵalysy negizinde áskerı-patrıottyq jumysty damytý kerek. Úkimetke 2025 jylǵa deıin áskerı-patrıottyq tárbıe berý baǵdarlamasyn ázirleýdi tapsyramyn. «Jas sarbaz» bastamasy úlgisimen elimizde eriktilerdi, ásirese áleýmettik jobalar salasyndaǵy eriktilerdi biriktirý qajet», - dedi Nursultan Nazarbaev.
QR Prezıdenti týrızmdi damytý máselesine de toqtaldy.
«Biz ózimizdiń Qazaqstandy bilmeımiz, shetelge baramyz. Qazaqstannyń keń baıtaq jeri biz úshin keremet. Shyǵysqa barsań Qytaımen shekaralas adam aıaǵy baspaǵan ný-toǵaı, ózender men kólder. Eń úlken ózenimiz Ertistiń 80 paıyz sýynyń ózimizdiń taýlardan alynatynyn bilmeımiz. Altaı bizdiń túrki dúnıesiniń shyqqan jeri. Ońtústik Qazaqstanda Aqsý-Aıýly, Qazyǵurt taýyna, Jetisý jerin aralap, taýlaryna shyqqan joqsyńdar. Kaspıı jaǵalaýynda qanshama demalys oryndary ashylyp jatyr. Qazaqstanda men aralamaǵan aýyl joq, kórgenimdi aıtyp otyrmyn. Eger týrızmdi damytar bolsa, Qazaqstan ekonomıkasyna 10 paıyz ósim qosatyn sala bolady», - dedi Elbasy.
Sonymen qatar Memleket basshysy jastar týrızmi halqymyzdyń birligin saqtaýǵa septigin tıgizetindigin basa aıtty.
«Sondaı-aq ishki óńirlik baılanystardy nyǵaıtýǵa, halyqaralyq seriktestikti de nyǵaıtýǵa septigin tıgizedi»,- dedi Elbasy.
Aıta keteıik, Astanada «Táýelsizdiktiń urpaqtary» ataýymen Jastar jylynyń ashylý saltanaty ótip jatyr.
Sharaǵa Úkimet músheleri, QR Parlamenti depýtattary, jergilikti atqarýshy organ basshylary, QR Prezıdenti janyndaǵy Jastar saıasaty keńesiniń músheleri, «100 jańa esim» baıqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jıynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýı medıa salasynyń ókilderi, balalar úıiniń tárbıelenýshileri men túlekteri, jas áskerı qyzmetshiler keldi.
Eske sala ketsek, QR Prezıdenti Nursultan Nazarbaev Qazaqstan halqyna ótken jylǵy Joldaýynda 2019 jyldy Jastar jyly dep jarııalaýdy usynǵan bolatyn.
Prezıdent sózinde jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin aıtty. Al, arada bir aıdan astam ýaqyt ótkende Elbasy Jarlyǵymen 2019 jyl Jastar jyly dep jarııalandy.
