Jastar turǵyn úı baǵdarlamasy boıynsha baspana qansha teńgege beriledi

NUR-SULTAN. QazAqparat – «Otbasy bank» AQ ortalyq fılıalynyń dırektory Jansultan Mataı jastarǵa arnalǵan turǵyn úı baǵdarlamasy arqyly ıpotekanyń qansha teńgege aınalatynyn aıtyp berdi, dep habarlaıdy QazAqparat tilshisi.

«Qazir Nur-Sultan men Almatyda jergilikti atqarýshy organdardan jastarǵa arnalǵan turǵyn úı baǵdarlamasyn ashý usynystary túsip jatyr. Bul baǵdarlama boıynsha turǵyn úı baǵasy – shamamen 13 mln teńge. Bul baǵa qaıdan shyqty? Birinshiden, baǵdarlama qabyldanǵan kezde bastapqy jáne qaıtalama naryqtardaǵy bir bólmeli páterdiń naryqtyq baǵasy sharshy metrine 280-320 myń teńge aralyǵynda boldy jáne esepteý kezinde osyndaı soma shyǵaryldy», - dedi Jansultan Mataı Ortalyq kommýnıkatsııalar qyzmetinde ótken baspasóz máslıhatynda.

Spıker osy baǵdarlama boıynsha bir bólmeli páterge aı saıynǵy ıpotekalyq tólem qansha bolatynyn aıtyp berdi.

«Eger osy baǵdarlama aıasynda 13 mln teńgege ıpoteka rásimdelse, aı saıynǵy tólem shamamen 101 myń teńge bolady, bastapqy jarna 10% quraıdy. Bul esepteýler aı saıyn páterdi jalǵa alýǵa ortasha eseppen 100 myń teńge jumsalatynyn eskere otyryp júrgizildi jáne ıpotekany rásimdeý kezinde tólemder somasy osy shekten aspaıtyn bolady», - dep túsindirdi Jansultan Mataı.

Buǵan deıin Jansultan Mataı «Elorda jastary» turǵyn úı baǵdarlamasynyń naýryz aıynda bastalatynyn habarlaǵan edi.

Sonymen birge «Memlekettik baǵdarlamalar boıynsha turǵyn úı baǵasy qymbattaı ma?» degen suraqqa jaýap bergen edi.