Jastar teatry Oralhan Bókeıdiń týyndysyn jańa formatta usyndy

Zamanaýı jańa formatta sahnaǵa shyǵarylǵan qoıylymnyń ózindik ereksheligi mol boldy. Asa daryndy qalamger O.Bókeıdiń tereń tolǵanystarǵa toly shyǵarmasy kórermen júregin birden jaýlap aldy. Jeńishan rólin somdaǵan tanymal akter Dáýren Serǵazın jazýshynyń ishki jan dúnıesin tebirentken týyndyǵa jan bitirdi, sóıletti, ánmen áýeletti. Daryndy akterdiń osy monolog túrindegi shyǵarmany halyqqa jetkizýde kóp izdegeni kórinip tur. «Bul án burynǵy ánnen ózgerek» dep Shákárim aqyn aıtpaqshy, bul monospektakl de biz kórip júrgen dástúrli qoıylymdardan ózgeshe.

«Oralhan Bókeıdiń kitaptaryn mektepte júrgende oqyp edik qoı. Nazar salyp qaraǵan adamǵa, ózimen ózi tildeskende jazýshynyń «Uıqym kelmeıdi» áńgimesi úlken áser etetini sózsiz. Osyndaı bir monospektakl shyǵarýdy oılaǵanda, osy «Uıqym kelmeıdi» áńgimesi oıyma tústi. Aıtar oıy bar týyndy bolǵan soń, sony tańdap aldyq. Kórermen kóńilinen shyǵý úshin jazýshy shyǵarmasyn jańasha usynýdy jón kórdik», - deıdi akter Dáýren Serǵazın.

Qoıylym barysynda osy týyndynyń ishki álemimen qabysyp jatqan jańa ánder oryndaldy. Monospektakldiń qoıýshy rejısseri atalǵan shyǵarmany sahnaǵa shyǵarý úshin birqatar aqyndardyń, atap aıtqanda, Hanbıbi Esenqaraqyzy, Qaırat Imanbekov, Aıbatyr Seıtaq, Hamza Kóksebektiń óleńderine júgingen. Ánderdiń mýzykasyn jazǵan D.Serǵazın.

Osy mýzykalyq monospektakldi tamashalaýǵa kelgen Oralhannyń qaryndasy Ǵalııa Bókeıqyzy aǵasy týraly estelikterimen bólisti. «Oralhannyń ómiri teatrmen tyǵyz baılanysty boldy. «Qulynym meniń» alǵashqy pesasy edi. Bastapqyda tsenzýraǵa ushyrap, sahnaǵa shyqpaı qala jazdap edi. Keıin joly boldy. Teatr synshylarynyń úlken baǵasyn aldy. Al endi búgin «Uıqym kelmeıdi» áńgimesi boıynsha mýzykalyq monospektakldi kórip, tamasha bir áserge bólendim. Mundaı monospektakldi alyp shyǵý akterdiń sheberliginiń arqasy. Dáýren Serǵazınge úlken rızashylyǵymyzdy bildiremiz jáne bolashaqta bıik belesterdi baǵyndyrýyna tilektespiz», - dedi Ǵalııa Bókeıqyzy.

«Oralhan aǵamyzdyń shyǵarmasy boıynsha monospektakl janrynda sahnalanǵan bul qoıylym sátti shyqty. Týyndy keıipkeriniń ómirine saıahat jasaǵandaı boldyq. Jalpy, monospektakl akterden asqan sheberlikti, rejısserden batyldyqty talap etedi. Óıtkeni qazirgi kórermenniń talǵamy zor! Qazaqstanda bul janr kenjelep bolsa da damyp keledi. Jastar teatry ujymyna talaptaryńa nur jaýsyn degen tilegimdi aıtamyn», - dedi qoıylymnan keıin ótken basqosýda pikir bildirgen óner janashyry Ońǵarbaı Dánebekov.

Sondaı-aq jas akterler Іńkár Nasıeva, Meıirǵat Amangeldın, Aqjan Orynbasarova jáne Aısultan Jálıev osy qoıylymnyń kórermen júregine jol tabýyna aıryqsha úles qosty.

Bul qoıylymnyń qoıýshy rejısseri de, oryndalǵan ánderdiń avtory da Dáýren Serǵazın ekenin aıta kektenimiz jón. Qoıýshy sýretshi Erlan Tuıaqov.

Teatrdyń kórkemdik jetekshisi Qazaqstannyń eńbek sińirgen qaıratkeri Nurqanat Jaqypbaı.