«Jastar tájirıbesi»: Petropavlda 176 adam kásiporyndarǵa jumysqa ornalastyrylmaq

PETROPAVL. QazAqparat – Petropavlda jumys taba almaı júrgen túlekterdi qoldaý maqsatynda «Jastar tájirıbesi» baǵdarlamasy iske asyrylyp otyr. Osy kúnge deıin 100 adam 51 kásiporynǵa ornalastyryldy, dep habarlaıdy QazAqparat tilshisi.

Petropavl qalasy ákimdiginiń málimetinshe, oqý oryndaryn bitirgen, biraq jumysqa ornalasa almaı júrgen jastarǵa 2021-2025 jyldarǵa arnalǵan kásipkerlikti damytý jónindegi ulttyq joba aıasynda qoldaý kórsetiledi. Jobanyń birneshe baǵyty bar, olar: jastar tájirıbesi, áleýmettik jumys orny, qoǵamdyq jumystar, alǵashqy jumys orny, urpaqtar kelisimi.

Sondaı-aq qysqa merzimdi kýrstan ótip, naryqta suranysqa ıe mamandyqty meńgerýge bolady nemese «Bastaý Bıznes» baǵdarlamasy arqyly kásipkerlik negizderin meńgerip, qaıtarymsyz grant alyp, óz isin ashýǵa múmkindik bar. Bıyl óńirde jastarǵa jáne halyqtyń áleýmettik osal toptaryna 799,4 mln teńgeniń 655 granty berilmek.

Mamandardyń aıtýynsha, «Jastar tájirıbesi» baǵdarlamasyna qatysý úshin jumyspen qamtý ortalyǵyna ótinish qaldyrý kerek. Petropavl qalasynda bıyl oqý oryndarynyń túlegi - 176 adamdy jumysqa ornalastyrý josparlanǵan. Olardyń 99-y oblys ortalyǵyndaǵy 51 kásiporynǵa jiberildi. Basymdyq berilgen mamandyqtar – zańgerler, baǵdarlamashylar, agronomdar, tehnık-qurylysshylar, býhgalterler, aýdarmashylar, ekologtar men geologtar.

Jalpy Soltústik Qazaqstan oblysynda bıyl 2021-2025 jyldarǵa arnalǵan kásipkerlikti damytý jónindegi ulttyq joba aıasynda 274 adamdy áleýmettik jumys oryndaryna, 476 adamdy «Jastar tájirıbesi» boıynsha, 2184 adamdy qoǵamdyq jumystarǵa, 231 adamdy «alǵashqy jumys orny», «urpaqtar kelisimi», «kúmis jas» jobalary boıynsha ornalastyrý kózdelgen.