Jastar sport oıyndarynyń kýbogy Astanaǵa ákelindi
ASTANA. 21 qazan. QazAqparat - Astana quramasy Qazaqstan Respýblıkasynyń ІІІ Jastar sport oıyndarynda jalpy komandalyq esepte 2-oryn aldy. Atalmysh dodada 472 sportshy elordanyń namysyn qorǵady. Astana komandasy óńirdiń sport tarıhynda tuńǵysh ret jalpykomandalyq esepte 2-orynǵa qol jetkizdi. Bul týraly astana.kz saıtyna qalalyq Týrızm, dene shynyqtyrý jáne sport basqarmasynan habarlady.
Jastar sport oıyndary birneshe aıǵa sozyldy. Jaqynda aımaqtyq sport vedomstvolary basshylarynyń qatysýymen Shymkent qalasynda Sport jáne dene shynyqtyrý isteri agenttigi alqasynyń kóshpeli otyrysy barysynda QR Qysqy spartakıadasy men ІІІ Jastar sport oıyndarynyń Kýboktaryn saltanatty tapsyrý rásimi ótti. Atalǵan eki keshendi shara - elimizdegi eń iri dodalar, sondaı-aq qysqy jáne jazǵy sport túrleri boıynsha elimizdiń qurama komandalaryn jasaqtaý úshin basty irikteý jarystary bolyp tabylady.
«Oıyn qorytyndylary boıynsha Astana quramasy 953 upaımen 103 altyn, 65 kúmis jáne 112 qola medal ıelendi», - delingen habarlamada.
Vedomstvonyń habarlaýynsha, Astana quramasy - Jastar sport oıyndary aıasynda barlyq sport túrinen jarystarǵa qatysqan jalǵyz komanda.
Jalpykomandalyq esepte elordalyqtar 17 sport túrinen júldeli oryn aldy. Maýtınbaık, basketboldan áıelder quramasy, kórkem gımnastıka men veloshosse komandalary jeńis tuǵyryna kóterildi.
Aıta keteıik, bıyl Qazaqstan Respýblıkasynyń ІІІ Jastar oıyndary 35 sport túri boıynsha ótti. Atap aıtqanda, aýyr atletıka, qazaq kúresi, oqpen atý, ústel tennısi, semserlesý, gandbol (erler, áıelder), sadaq atý, voleıbol (erler, áıelder), boks, basketbol (erler, áıelder), dzıýdo, toǵyzqumalaq, sporttyq gımnastıka, kórkem gımnastıka, jeńil atletıka, stendtik atý, taekvondo, tennıs, júzý, velotrek, maýtınbaık, veloshosse, baıdarkamen jáne kanoemen esý, grek-rım kúresi, áıelder kúresi, erkin kúres, sý polosy (erler, áıelder), sýǵa sekirý, akademııalyq júzý, regbı (erler, áıelder).
Jarysqa 14 oblystyń, Almaty jáne Astana qalalarynyń sportshylary qatysty. Jastar sport oıyndary tórt jylda bir ret ótkiziledi. Sharanyń maqsaty jazǵy sport túrlerin odan ary damytý, oqý-jattyǵý úrdisiniń sapasyn tekserý bolyp tabylady.
