Jastar «Shabyt» festıvaline músinder, zergerlik jáne toqyma buıymdar alyp keldi
ASTANA. QazAqparat - Astanada ótip jatqan «Shabyt» festıvaliniń «Beıneleý óneri» nomınatsııasyna 200-den astam jas sýretshi men músinshi qatysyp jatyr, dep habarlaıdy QazAqparat.
Bul týraly Astana qalalyq mádenıet, muraǵattar jáne qujattama basqarmasynan málim etti.
Bıyl atalǵan nomınatsııaǵa músin jáne sándik-qoldanbaly óner boıynsha jumystar qabyldanǵan. Toqtar Ermekov, Quttybek Jaqypov, Batıma Zaýrbekova sııaqty tanymal ónerpazdardan quralǵan qazylar alqasy baıqaýdyń qorytyndysyn erteń jarııalaıdy.
«Qatysýshylar birneshe eńbekterin jiberdi, olardyń ishinde ujymdyq jumystar da boldy. Onyń barlyǵyn Táýelsizdik saraıynyń galereıasynan tamashalaýǵa bolady. Jas daryndar qazylar alqasynyń nazaryna gobelender, kartınalar, músinder, keramıkalyq buıymdar men zergerlik áshekeıler, tekemetter men basqa da zattardy usynýda. Ekinshi kezeńge júzge jýyq jumys iriktep alyndy. «Shabyt» jas daryndardyń oı-órisin keńeıtýge jáne óz kúshin baǵalaýǵa múmkindik beredi», - dedi qazylar alqasynyń múshesi Quttybek Jaqypov.
Konkýrsqa qatysý úshin arnaıy Almatydan kelgen Nazıma Ryspekova baıqaýǵa óz qolymen jasaǵan syrǵasy men saqınasyn usynypty.
«Men «Baqyt qusy» atty kompozıtsııany usyndym. Syrǵa men saqınada qyran beınelengen jáne ol ulttyq naqyshtaǵy oıýlarmen órnektelgen. Basqa qatysýshylardyń jumystarymen tanysqan soń, áli de kóp eńbektenýim kerektigin túsindim. Munda daryndy jastar kóp», - dedi óz áserimen bólisken konkýrs qatysýshysy.
Aıta keteıik, baıqaýǵa qatysýshylar músin men sándik-qoldanbaly óner boıynsha úsh orynǵa talasady.
