Jastar sektalardyń shyrmaýyna túspeýi úshin dinı saýattylyqtaryn arttyrý kerek -Almatydaǵy dóńgelek ústel
ALMATY. 10 qarasha. QazAqparat /Názıra Eleýhan/ - Sektalardyń shyrmaýyna túspeý úshin, jastar arasynda kóbirek dinı saýattylyq boıynsha jumystar júrgizilip, olardyń dinı biliktilikterin arttyrý kerek.
Dástúrli emes dinı aǵymdardyń jumystaryna bılik tarapynan tosqaýyl qoıý qajet. Sańyraýqulaqtaı qaptaǵan dástúrli emes dinder aldap-arbaý men ıdeologııalyq qural arqyly eldiń birligine iritki salýda. Bul týraly búgin Almatyda "Sektadan saqtan" degen taqyryppen ótken "dóńgelek ústel" otyrysynda aıtyldy.
Abaı atyndaǵy ulttyq pedagogıkalyq ýnıversıtetiniń tarıh fakýltetiniń dekany, tarıh ǵylymdarynyń doktory Ǵabıt Kenjebaevtiń aıtýynsha, qazaq tarıhynda eshqashan Atyraýdaǵydaı tosyn oqıǵalar, terrorızm sııaqty máseleler ózekti bolǵan emes. "Sońǵy kezde elimizde bolyp jatqan jaısyz oqıǵalar keleńsiz nárselerdiń qalyptasyp, qordalanyp jatqandyǵyn aıqyn kórsetedi. Onyń túpki tamyry dástúrli emes dinderdiń qalyptasýyna ákep otyr. Búgingi tańda ózderińiz kórip, bilip otyrǵandaı elimizde dástúrli emes dinder qanat jaıyp bara jatyr jáne olar dinimizge qarsy jumys jasaýda, el birligine qaýip tóndirýde. Bir ókinishtisi, ol sektalardan qanshama otbasy zardap shegýde jáne onyń yqpalyna kóbine jastar urynýda",-dep atap ótti ol.
Onyń pikirinshe, shyrmaýǵa túspeý úshin, halyqtyń jáne tez eliktegish keletin jastar arasynda túsindirý jáne nasıhattyq jumystardy kóbirek júrgizý kerek. "Birden 20 jyl boıy qalyptasqan sektalardy joıyp jiberý múmkin emes, sondyqtan birte-birte úgit-nasıhattyq jumystaryn kúsheıtý arqyly jáne olardyń jumystaryna qarsy baǵyttaǵy sharalardy keń júrgizý arqyly joıýýymyz kerek",-dedi Ǵabıt Kenjebaev.
Táýelsizdik alǵan 20 jyl ishinde dástúrli emes birlestikterdiń sany 54-ten 1189-ǵa deıin artsa, sońǵy 1-2 jyl ishinde 19 memlekettik emes dinı uıymdar tirkelgen. Búgingi statıstıkalyq málimettterge súıensek, árbir uıymǵa orta eseppen 50 adamnan barady eken.
Atalmysh shara elimizdiń bolashaǵy bolyp tabylatyn jastar arasynda sektanyń maqsaty men kózdegen múddesin, eldiń arasyna salyp jatqan iritki saıasatyn anyqtap aıtý men jastardyń sektalardyń shyrmaýyna túsip ketpeýi úshin arnaıy uıymdastyryldy.
Basqosýda negizgi din - musylman dininiń qashan paıda bolǵandyǵy, mańyzdylyǵy men ózektiligi, tarıhy, jalpy qazaq qoǵamyndaǵy ár qıly kezeńderde musylman dininiń ólmeı, halyqtyń negizgi dini bolyp saqtalyp qalǵanydyǵy, hıdjap kııý men saqal jiberý, sondaı-aq ózge dinderdiń yqpalyna túspeý syndy taqyryptar sóz boldy.
Dóńgelek ústelde Qazaqstan musylmandary Dinı basqarmasynyń ókili Ońǵar qajy Ómirbek pen atalmysh dinı mekemeniń ýaǵyz- nasıhat bóliminiń qyzmetkeri Asylbek Noǵaev sóz sóılep, stýdent-jastar tarapynan qoıylǵan dinı máselelerge baılanysty suraqtarǵa jaýap berdi.
Dóńgelek ústel barysynda Islam dininiń ýaǵyzdaryn nasıhattaıtyn kitaptar men arnaıy fılm kórsetildi.
Basqosýǵa ýnıversıtettiń stýdentteri men oqytýshylary qatysty.
