Jastar saıasatynyń kórsetkishi fleshmob ótkizýmen shektelmeýi kerek - Jaqsylyq Omar
TALDYQORǴAN. QazAqparat - Búgin Almaty oblysy ákiminiń orynbasary Jaqsylyq Omardyń tóraǵalyǵymen oblys ákimdigi janyndaǵy kámeletke tolmaǵandar isteri men olardyń quqyǵyn qorǵaý jónindegi komıssııanyń kezekti otyrysy ótti, dep habarlaıdy QazAqparat.
Oblystyq bilim basqarmasynyń basshysy Lázzat Bazarqulovanyń aıtýynsha, óńirde jetim jáne ata-ananyń qamqorlyǵynsyz qalǵan 3071 bala bar. Qazirgi kezde sonyń 83,5%-i nemese 2564 bala otbasylardyń asyraýyna berilgen. Onyń ishinde 2446 bala qamqorlyqqa alynǵan, 70-i patronattyq tárbıege, 48-i otbasylyq úlgidegi úılerge ornalastyrylǵan. Bıylǵy jyldyń 5 aıynda jetim balalar úılerinen 23 bala óz otbasyna oraldy.
«Júrgizilip jatqan jumystarǵa qaramastan birqatar kemshilikter de bar. Oblystyń biraz aýdandarynda, atap aıtqanda Aqsý, Kerbulaq, Kóksý, Sarqan aýdandarynda «Balalar úıi joq Jetisý» jobasynyń sheńberindegi sharalar báseń júrýde. Jambyl, Raıymbek, Uıǵyr, Alakól, Balqash aýdandarynda patronajdyq tárbıe damytylmaǵan nemese baıaý damýda», - dedi bilim basqarmasynyń basshysy.
Onyń sózine qaraǵanda, 2018 jylǵa patronajdyq tárbıege 60 balany ornalastyrý josparlanǵan.
Jıyn barysynda oblys ákiminiń orynbasary Jaqsylyq Omar komıssııa jumysyn shıratý qajettigin aıtyp, komıssııa músheleri tarapynan naqty usynystar berilmeı otyrǵanyn atap ótti.
«Qamqorlyqsyz qalǵan balalarǵa aıaýshylyq bildirý azdyq etedi, bizge naqty sharalar qajet. Áleýmettik saýalnama júrgizip, balalardyń qandaı máseleleri bar ekenin anyqtaý kerek. Bul tárbıege de, oqytýǵa da baılanysty. Aldymen balalardyń pikirine qulaq túrgen lázim. «Bala - bizdiń bolashaǵymyz» degen naqyldy jıi aıtamyz, sol balalarǵa qajetti kómek pen qoldaý kórsetý, tolyqqandy áleýmettendirýge qolaıly jaǵdaı jasaý - tikeleı mindetimiz, - dedi Jaqsylyq Omar.
Ol sonymen qatar, jastar saıasaty jónindegi basqarmanyń jumysyn da synǵa alyndy.
«Basty maqsat - jumyssyz jastarmen jumys júrgizý. Eń aldymen solarǵa naqty qoldaý kórsetip, kásipti meńgerýlerine, turaqty jumysqa ornalasýlaryna járdemdesý kerek. Jastardyń jaǵdaıyna turaqty taldaý jasap, sonyń qorytyndysy boıynsha usynystar berý qajet. Fleshmobtar ótkizý - bizdiń jumysymyzdyń kórsetkishi emes, naqty sharalardy júzege asyrýymyz kerek, - dedi J. Omar.
Jıyndy qorytyndylaǵan oblys ákiminiń orynbasary komıssııa múshelerine oblystyń aýdan, qalalaryna shyǵyp, áleýmettik jetimdiktiń aldyn alý boıynsha aqparattyq-túsindirý jumystaryn belsendi júrgizýdi tapsyrdy. Sonymen qatar týyndaǵan máselelerdi anyqtaý maqsatynda jetim jáne ata-ananyń qamqorlyǵynsyz qalǵan balalardyń arasynda áleýmettik saýalnama júrgizý týraly tapsyrma berildi.
