Jastar saıasatyn damytýdyń 2021 jylǵa deıingi Jol kartasy ázirlendi - Qyzylorda oblysy
QYZYLORDA. QazAqparat - «Qyzylorda oblysy boıynsha memlekettik jastar saıasatyn damytýdyń 2021 jylǵa deıingi Jol kartasy» ázirlendi, dep habarlaıdy QazAqparat.
Jol kartasyna 10 baǵyt boıynsha 31 nysanaly ındıkator engizilgen. Osy arqyly óńir jastary arasynda qalyptasyp otyrǵan áleýmettik problemalardy kezeń-kezeńimen sheshý, tabysty, básekege qabiletti jáne ultjandy jas qazaqstandyqtardy qalyptastyrý maqsatynda salalaralyq baılanys kúsheıtiledi. Bul týraly óńirlik kommýnıkatsııalyq qyzmetindegi brıfıngte oblystyq jastar saıasaty máseleleri basqarmasynyń basshysy Erkebulan Meńlibaev baıandady.
Jastar arasynda quqyq buzýshylyqtyń aldyn alý, kámeletke tolmaǵandar arasyndaǵy qylmystyń ósýine jol bermeý de basty nazarda tur. Osy baǵyttaǵy jumystardy úılestirý maqsatynda «Oblys boıynsha NEET sanatyndaǵy jastarmen jumys jasaý jónindegi is-sharalar jospary» bekitildi.
Jospar aıasynda jastarǵa qylmystyń aldyn alý sharalaryn nasıhattaý maqsatynda ótkizilgen kezdesýler barlyq joǵary, tehnıkalyq jáne kásiptik bilim berý uıymdary men aýdandarda, 36 aýyldyq okrýgte ótip, oǵan 6000-nan astam jas tartyldy. Kezdesýde jastar tárbıesi, ulttyq qundylyqtarymyzdy saqtaý maqsatynda túsindirme júrgizilip, arnaıy ázirlengen beınerolıktiń kórsetilimi uıymdastyryldy.
Sondaı-aq, oblys ákimdiginiń ahýaldyq ortalyǵynda NEET sanatyndaǵy jastardyń modýli qurylýda. Modýldiń negizgi maqsaty - osy sanattaǵy jastar kórsetkishiniń ósý dınamıkasyn baqylaý jáne áser etýshi faktorlardy anyqtaý, olarmen naqty jumys júrgizý.
